Тоҷикистон ҳамкориро дар самти ҷалби сармоя бо Малайзия тақвият медиҳад

ДУШАНБЕ, 28.03.2025 /АМИТ «Ховар»/. Тоҷикистон ва Малайзия дар самти ҷалби сармоя ҳамкориро тақвият медиҳанд. Ин ва дигар масъалаҳои марбут ба таҳкими ҳамкорӣ байни ду давлат дар мулоқоти Раиси Кумитаи давлатии сармоягузорӣ ва идораи амволи давлатии Тоҷикистон Султон Раҳимзода ва Президенти Анҷумани тиллои Малайзия Дато Вира Лиус Нг дар Душанбе баррасӣ гардиданд. Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Дар мулоқот раиси Кумитаи давлатии сармоягузорӣ ва идораи амволи давлатӣ ба сармоягузорони малайзиягӣ доир ба фазо ва имконоти сармоягузории Тоҷикистон, аз ҷумла дар соҳаи саноати металлургӣ маълумот пешниҳод намуд.

Дар анҷом ҷонибҳо барои тақвияти ҳамкорӣ дар ин самт изҳори омодагӣ намуданд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон