Ҳафтаи илм, технология, инноватсия ва ихтироъкории наврасону ҷавонони шаҳри Душанбе ҷамъбаст шуд

ДУШАНБЕ, 11.04.2025. /АМИТ «Ховар»/. Дар IT PARK-и шаҳри Душанбе маросими ҷамъбастии «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» баргузор гардида, ғолибони озмунҳои он  қадрдонӣ шуданд. Дар ин хусус ба АМИТ «Ховар» аз Маркази таҳлилӣ-иттилоотии назди Сарраёсати маорифи шаҳри Душанбе хабар доданд.

Таъкид карда шуд, ки дар доираи таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон ба соҳаи илму маориф бо ибтикори Мақомоти иҷроияи ҳокимияти давлатии шаҳри Душанбе барои омӯзгорону хонандагони муассисаҳои таълимии пойтахт озмуну чорабиниҳои гуногун баргузор карда мешаванд. Ҳамасола теъдоди зиёди хонандагону омӯзгорон бо мукофотҳои пуливу туҳфаҳои хотиравӣ қадрдонӣ карда мешаванд.

Иброз гардид, ки баргузории чорабиниҳои маърифатӣ ва озмунҳои зеҳнӣ дар ташаккули ҷаҳонбинии илмӣ, тақвият бахшидани ҳофизаи фарҳангӣ, рушди маҳорату малакаҳои шахсӣ, баланд бардоштани сатҳу сифати таҳсил ва ба ин васила таъмини рушди бемайлони илму маорифи миллӣ заминаи мусоид фароҳам месозад.

Ёдовар мешавем, ки бо ташаббус ва иқдоми хирадмандонаи Пешвои миллат барои бедор намудани шавқу рағбати хонандагон ба омӯзиши илмҳои дақиқ, табиӣ ва риёзӣ ҳамасола дар пойтахти мамлакат «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» баргузор мегардад.

АКС: Маркази таҳлилӣ-иттилоотии назди Сарраёсати маорифи шаҳри Душанбе