Ҳайати паҳлавонони тоҷик барои иштирок дар Мусобиқаи байналмилалии гӯштингирӣ барои дарёфти «Ҷоми Раиси шаҳри Душанбе» муайян шуд

ДУШАНБЕ, 23.04.2025 /АМИТ «Ховар»/. 26 апрели соли 2025 дар Қасри тенниси шафати Варзишгоҳи марказии шаҳри Душанбе бахшида ба Рӯзи пойтахт барои дарёфти Ҷоми Раиси шаҳри Душанбе Мусобиқаи шашуми байналмилалӣ оид ба гӯштингирӣ баргузор мегардад. Дар ин хусус ба шореҳи АМИТ «Ховар» котиби генералии Федератсияи гӯштини миллӣ-гӯштингирии Тоҷикистон Абдулло Саидхоҷаев хабар дод.

Дар ин мусобиқаи сатҳи баланд паҳлавони маъруфи зиёда аз 25 давлати ҷаҳон дар вазнҳои 65кг, 78кг, 95 ва +95 барои мақомҳои ифтихорӣ бо ҳам рақобат менамоянд. Духтарон танҳо дар вазни то 70кг ҳунарнамоӣ мекунанд.

Ҳайати дастаи мунтахаби Тоҷикистон дар Мусобиқаи шашуми байналмилалӣ оид ба гӯштингирӣ барои дарёфти Ҷоми Раиси шаҳри Душанбе ба муносибати Рӯзи пойтахти Ҷумҳурии Тоҷикистон муайян гардид.

Байни мардон дар вазни 65 кг Халифаев Муллораҷаб, Боқиев Суҳроб, Каримов Муслимбек, Абдушукуров Сарвар, дар вазни 78кг Наҷмиддинов Маҳмадшариф, Фарҳодов Раҳматуллобек, Шукронов Қоим ва Боқиев Абубакр, дар вазни 95кг Раҳимов Исроил, Раҳимов Улуғбек, Устопириён Комроншоҳ ва Меҳробҷонзода Муҷиб ва ниҳоят дар вазни +95 кг Мирмамадов Шакармамад, Назриев Шариф, Насимов Фирдавс ва Қурбоналлиев Дадахон ҳунарнамоӣ мекунанд.

Байни духтарон дар вазни 70кг Назарова Ҷонона, Қаландарова Шоҳида ва Гулбоева Фазилат ҳунарнамоӣ менамоянд.

Ёдовар мешавам, ки ҷоизаи умумии мусобиқа 110 ҳазор доллари амрикоиро ташкил медиҳад. Ғолибони мақоми аввал соҳиби 10 ҳазор доллар, ҷойи дуюм соҳиби 5 ҳазор доллар ва мақомҳои сеюм сазовори 2 ҳазору 500 доллари амрикоӣ мегарданд.

Мусобиқа дар асоси қарори Раиси шаҳри Душанбе бо мақсади ташвиқу тарғиб, рушду равнақи варзиш ва таъмини оммавияти варзишу солимгардонии сокинони пойтахт гузаронида мешавад.

АКС аз манбаъҳои боз