Байни Кумитаҳои миллии олимпии Тоҷикистон ва Эрон Ёддошти тафоҳуми хамкорӣ ба имзо расид

ДУШАНБЕ, 06.04.2025. /АМИТ «Ховар»/. Имрӯз дар доираи баргузории Форуми Шурои олимпии Осиё ва ҳамбастагии олимпӣ байни Кумитаи миллии олимпии Тоҷикистон ва Кумитаи миллии олимпии Ҷумҳурии Исломии Эрон Ёддошти тафоҳуми ҳамкорӣ барои давраи то соли 2028 ба имзо расид, иттилоъ медиҳад АМИТ «Ховар».

Ёддошти тафоҳум аз ҷониби ноиби Кумитаи миллии олимпии Тоҷикистон Зулфиқор Гулаҳмадзода ва котиби генералии Кумитаи миллии олимпии Ҷумҳурии Исломии Эрон Маҳдӣ Алинаҷод бо мақсади инкишоф додани ҳамкории самарабахш ва пеш бурдани Ҳаракати олимпӣ ба имзо расонда шуд.

Дар доираи он ҳарду ҷониб чорабиниҳои дуҷониба, ҷамъомадҳои машқӣ-таълимӣ барои варзишгарон, инчунин барномаҳои маркетингӣ ташкил намуда, варзиш, Ҳаракати олимпӣ, идеяи бозии одилонаро тарғиб мекунанд ва рушди фаъолияти варзиширо барои ҳама дастгирӣ менамоянд.
Ҷонибҳо оид ба масъалаҳои марбут ба варзиш дар ҳама сатҳҳо бо ҳамдигар машварат мекунанд, инчунин таҷриба ва дониши худро ба манфиати варзиш мубодила менамоянд.

Инчунин иштироки дастаҳо ва варзишгарон дар мусобиқаҳои дуҷониба ва бисёрҷониба, ки дар қаламрави Ҷумҳурии Тоҷикистон ва Ҷумҳурии Исломии Эрон баргузор мегарданд, таъмин гардида, ҳар ду тараф ба якдигар тақвими дахлдори солонаи чорабиниҳои варзиширо барои иштироки федератсияҳои миллии дахлдори ҳарду кишвар пешниҳод мекунанд.

Дар доираи он мубодилаи мураббиён, таҷрибаи тиббии варзиш, мутахассисони варзишӣ ва дастаҳои ваварзишгарон дар назар аст.

Ҳамзамон бо мақсади ба роҳ мондан ва рушди ҳамкории мутақобилан судманди академӣ дар соҳаҳои илмӣ, техникӣ, таълимӣ, тадқиқотӣ, фарҳангӣ, санъат ва ҳама гуна фаъолияти дигари марбут ба пешбурди Ҳаракати олимпӣ, ҳарду ҷониб метавонанд мувофиқ бошанд.

АКС: АМИТ «Ховар»