Бо истифода аз барномаи «Нозири минтақавии ман» шаҳрвандон метавонанд нозири минтақавии худро шиносанд

ДУШАНБЕ, 16.04.2025. /АМИТ «Ховар»/. Бо мақсади сари вақт баррасӣ намудани муроҷиатҳои шаҳрвандон, пешгирии фаврии ҷинояткорию ҳуқуқвайронкунии маъмурӣ ва баланд бардоштани нақши нозирони минтақавии милитсия дар таъмини тартиботи ҷамъиятӣ дар саҳифаи «Телеграм» бо номи «Нозири минтақавии ман» барномаи махсуси худкор (бот) таъсис дода шуд. Дар ин хусус ба АМИТ «Ховар» аз Раёсати Вазорати корҳои дохилӣ дар шаҳри Душанбе хабар доданд.

Ба иттилои масъулин, сокинону меҳмонони пойтахт бо истифода аз ин барнома метавонанд нозири минтақавии худро шиносанд ва бо ӯ ба осонӣ дар тамос шаванд.

Шаҳрвандонро зарур аст ҳангоми истифода номи кӯча, маҳалла, бинои истиқоматӣ, марказҳои савдо ва хизматрасонӣ, биноҳои маъмурӣ ва ё дигар маконҳои ҷамъиятиро дар қисмати «ҷустуҷӯ» бо ҳуруфи тоҷикӣ бе хато ворид созанд. Дар ин ҳолат нозирони минтақавие, ки дар он макон фаъолият менамоянд, дар равзанаи барнома пайдо мешаванд.

Шаҳрвандон пеш аз истифода бояд бо қоидаҳои барнома шинос шаванд.

АКС: Раёсати Вазорати корҳои дохилӣ дар шаҳри Душанбе