Дар конфронси Бишкек аз ташаббусҳои Президенти Тоҷикистон вобаста ба масоили обу иқлим ва пиряхҳо ёдоварӣ намуданд

ДУШАНБЕ, 28.04.2025 /АМИТ «Ховар»/. Ҳайати Кумитаи ҳифзи муҳити зисти назди Ҳукумати Ҷумҳурии Тоҷикистон таҳти роҳбарии муовини раиси Кумита Лоиқ Раҳмонзода дар конфронси байналмилалии «Муколамаи ҷаҳонии кӯҳӣ барои рушди устувор», ки дар шаҳри Бишкек баргузор гардид, иштирок намуда, доир ба ташаббусҳои Президенти Ҷумҳурии Тоҷикистон муҳтарам Эмомалӣ Раҳмон вобаста ба масъалаҳои обу иқлим ва пиряхҳо сухан намуд.

АМИТ «Ховар» бо истинод ба Кумитаи ҳифзи муҳити зисти назди Ҳукумати ҷумҳурӣ иттилоъ медиҳад, ки ҳадафи конфронс ҳамоҳангсозии кӯшишҳои давлатҳои манфиатдор, аз ҷумла кишварҳои кӯҳӣ барои ҳамгироии рӯзномаи кӯҳӣ ба равандҳои байналмилалии иқлим, конвенсияҳои экологӣ ва рушди устувор, ҷалби таваҷҷуҳи байналмилалӣ ба мушкилоти экологӣ, иҷтимоӣ ва иқтисодии минтақаҳои кӯҳӣ ва таҳияи ташаббусҳои муштарак барои таҳкими ҳамкорӣ ва омодагӣ ба Саммити дуюми ҷаҳонии кӯҳии Бишкек 2027 «Бишкек+25» мебошад.

Муовини раиси Кумитаи ҳифзи муҳити зисти назди Ҳукумати ҷумҳурӣ иштирокдорони конфронси байналмилалии «Муколамаи ҷаҳонии кӯҳӣ барои рушди устувор»-ро ба Конфронси сатҳи баланди байналмилалии «Соли 2025- Соли байналмилалии ҳифзи пиряхҳо», ки 29-31 майи соли 2025 дар шаҳри Душанбе баргузор мегардад, даъват намуд.

Намояндагони ҳайати кумита ҳамзамон дар чорабиниҳои канорӣ ва маросими ниҳолшинонӣ дар Парки давлатии «Ала-Арча» иштирок намуданд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон