ДАРАХТ БИНШОН! Дар боғи навбунёди ноҳияи Мурғоб беш аз 10 ҳазор бех ниҳол шинонида шуд

ДУШАНБЕ, 23.04.2025 /АМИТ «Ховар»/. Дар доираи Барномаи «Кишвари сабз» дар ноҳияи дурдаст ва баландкӯҳи Мурғоб дар 10 гектар боғи нав ташкил гардида, дар он беш аз 10 ҳазор бех ниҳоли дарахтони сояафкан шинонида шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

         Ҳадафи ин ташаббус, ки дар партави дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон амалӣ гардонида шуд, сабзгардонии муҳити зист ва ободу зебо намудани ноҳияи Мурғоб мебошад.

Дар  ҳашари ниҳолшинонӣ дар боғи  навбунёд роҳбарияти Мақомоти иҷроияи ҳокимияти давлатии Вилояти Мухтори Кӯҳистони Бадахшон, ноҳияи Мурғоб ва сокинону фаъолон иштирок намуданд.

Бояд тазаккур дод, ки дар доираи татбиқи марҳилаи якуми  Барномаи «Кишвари  сабз» дар Вилояти Мухтори Кӯҳистони Бадахшон дар 285 гектар дарахтони сояафкан ва ҳамешасабз шинонида мешаванд. Аз ҷумла, дар 70 гектар боғи хуч ва дар 60 гектар боғи ангат  бунёд мегардад, ки аҳамияти иқтисодӣ низ доранд. Инчунин дар 45 гектар дарахтони мевадиҳанда ва чормағз парвариш карда мешаванд.

Дар ноҳияи Мурғоб дар 60 гектар ниҳолҳои хуч, терескен, сафедор ва бед шинонида мешаванд.

    АКС: Кумитаи ҳифзи муҳити зисти назди Ҳукумати Ҷумҳурии Тоҷикистон