Фаронса шумораи квотаҳоро барои таҳсили шаҳрвандони Тоҷикистон зиёд менамояд

ДУШАНБЕ, 17.04.2025. /АМИТ «Ховар»/. Ҷумҳурии Фаронса тасмим гирифтааст, ки шумораи квотаҳоро барои таҳсили шаҳрвандони Ҷумҳурии Тоҷикистон зиёд кунад. Квотаҳо дар айни замон 50 адад буда, дар оянда ба 150 адад расонида мешаванд. Инчунин тасмим гирифта шудааст, ки волонтёрон – омӯзгорон аз Фаронса ба донишгоҳҳои Тоҷикистон, ки дар заминаи онҳо забони фаронсавӣ омӯзонида мешавад, ҷалб гарданд.

Чунин иттилоъ дода шуд зимни вохӯрии Вазири маориф ва илми Тоҷикистон Раҳим Саидзода бо сенатори Ҷумҳурии Фаронса Саманта Казбон.  Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Вазири маориф ва илм иброз дошт, ки вохӯрии имрӯза далели рушду тавсеаи ҳамкорӣ байни Тоҷикистону Фаронса дар соҳаҳои маориф ва илм аст. Таъкид карда шуд, ки ҳамкорӣ дар соҳаҳои маориф ва илм бо Ҷумҳурии Фаронса дар асоси Созишнома оид ба ҳамкории фарҳангӣ, илмӣ ва техникӣ байни Ҳукумати Ҷумҳурии Тоҷикистон ва Ҳукумати Ҷумҳурии Фаронса аз 4 августи соли 2003 амалӣ гардидааст. Ин ҳамкорӣ дар натиҷаи фаъолияти судманди ду ҷониб сол то сол рушд менамояд.

Саманта Казбон омодагии ҷониби Фаронсаро барои дар сатҳи беҳтар ба роҳ мондани ҳамкорӣ дар доираи барномаҳои байналмилалӣ иброз намуда, ба ҳамкории тарафҳо дар самти таҳсилоти олии касбӣ ва табодули таҷрибаю дониши донишҷӯёну устодон ишора намуд.

Сенатори Ҷумҳурии Фаронса вобаста ба ифтитоҳи Маркази омӯзиши забони фаронсавӣ изҳор дошт, ки “мо омодаем дар Тоҷикистон Маркази омӯзиши забони фаронсавӣ ба истифода диҳем. Дар заминаи он ҷавонон метавонанд ба Ҷумҳурии Фаронса барои таҳсил сафар намоянд. Ҳамчунин мо омодаем, ки дар Фаронса ба ҷавонони тоҷик забони фаронсавӣ омӯзонем ва ба таҳсил ҷалб созем”.

Дар доираи барномаҳои байналмилалӣ ва минтақавӣ, аз ҷумла TEMPUS, gSmart, UNIWORK, INTERASIA, gSmart – Spatial ICT Infrastructures for Smart Places устодон вa коршиносони муассисаҳои таҳсилоти олии касбии Ҷумҳурии Тоҷикистон дар конфронсҳо, симпозиумҳо ва семинарҳои таълимию методие, ки бо ибтикори ташкилоти байналмилалӣ дар Тоҷикистон ва Фаронса баргузор мегарданд, иштирок менамоянд. Ҳамзамон давоми ду соли охир намояндагони Вазорати маориф ва илми Ҷумҳурии Тоҷикистон бо даъвати Бунёди илмии Созмони ҳамкории иқтисодӣ (ЕСОЅЕ) дар машварати байналмилалӣ оид ба илм ва таҳсилоти технологӣ, ки дар Ҷумҳурии Фаронса баргузор мегардад, иштирок менамоянд.

Иттилоъ дода шуд, ки дар заминаи панҷ муассисаи таҳсилоти олии касбии мамлакат забони фаронсавӣ омӯзонида мешавад. Дар умум 557 донишҷӯ ба омӯзиши забони фаронсавӣ фаро гирифта шудаанд.

Дар вохӯрӣ масъалаҳои зиёд, аз ҷумла бурсияҳои таҳсилӣ, лоиҳаҳои муштарак дар самтҳои гуногуни соҳа, омӯзиши забони фаронсавӣ, таъсиси маркази омӯзиши забони фаронсавӣ ва равобити байни муассисаҳои таълимии ду давлат мавриди баррасӣ қарор гирифтанд.

АКС: Маркази матбуоти Вазорати маориф ва илми Ҷумҳурии Тоҷикистон