Кумакҳои навбатии Пешвои миллат муҳтарам Эмомалӣ Раҳмон ба зарардидагони офати табиии дар ноҳияҳои Рашт ва Тоҷикобод фиристода шуд

Апрель 25, 2025 11:56

ДУШАНБЕ, 25.04.2025 /АМИТ «Ховар»/. 25 апрел кумакҳои навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон иборат аз масолеҳи сохтмонӣ ба зарардидагони заминларза дар ноҳияҳои Рашту Тоҷикобод фиристода шуданд.

Аз рӯзҳои нахустини ба амал омадани заминларза дар ноҳияҳои Рашту Тоҷикобод ҷараёни бартарафсозии оқибатҳои офати табиӣ ва тадбирҳои расонидани кумакҳои фаврӣ ба мардуми зарардида таҳти назорат ва таваҷҷуҳи доимии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қарор дорад.

Аз ҷумла, 15 апрел дар асоси дастури Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба зарардидагони заминларзаи ноҳияҳои Рашту Тоҷикобод кумакҳо, иборат аз маҳсулоти хӯрокворӣ, ашёи хоҷагидорӣ ва масолеҳи сохтмонӣ фиристода шуда буд.

Ҳамзамон 17 апрел Президенти Ҷумҳурии Тоҷикистон муҳтарам Эмомалӣ Раҳмон дар маҷлиси ғайринавбатии Ҳукумати Ҷумҳурии Тоҷикистон барои ҳарчи зудтар ва пурра рафъ намудани оқибатҳои ин заминларза, ҳалли мушкилиҳои пешомада ва бо ёрию ғамхории ҳамаҷониба фаро гирифтани аҳолии осебдида ба Комиссияи ҳукуматӣ, мақомоти дахлдор ва раисони ноҳияҳои Рашту Тоҷикобод супоришҳои мушаххас доданд.

Пешвои миллат муҳтарам Эмомалӣ Раҳмон аз вазорату идораҳои дахлдор талаб намуданд, ки барои ҳарчи зудтар ба роҳ мондани раванди таълим, ба табобати саривақтӣ фаро гирифтани нафарони ҷароҳатҳои ҷисмонӣ бардошта, назорати қатъии ҳолати санитарию эпидемиологии минтақаҳои аз офати табиӣ зарардида ва сари вақт таъмин кардани сокинон бо маводи доруворӣ ва дигар лавозимоти тиббӣ тадбирҳои қатъӣ андешанд. Таъкид гардид, ки фаъолияти муассисаҳои таълимӣ ва раванди таълиму тарбияи хонандагон, аз ҷумла дар ҷойҳои муваққатӣ бояд бемонеа идома ёбад.

Бояд гуфт, ки бо дастури Президенти Ҷумҳурии Тоҷикистон муҳтарам Эмомалӣ Раҳмон, ки аз сиёсати инсондӯстонаашон бармеояд, барои аҳолии аз офати табиӣ зарардидаи ноҳияҳои Тоҷикободу Рашт расонидани кумакҳои ҳамаҷонибаи фаврӣ идома дошта, бунёди манзилҳои истиқоматии пурра харобгардидаи сокинони ду ноҳия оғоз гардидааст ва ба сокинони манзилҳои истиқоматияшон қисман зарардида тамоми масолеҳи сохтмонӣ кумак карда шудааст. Ҳамзамон дар доираи таваҷҷуҳ ва ғамхории доимии Пешвои миллат муҳтарам Эмомалӣ Раҳмон тамоми зарардидагони эҳтиёҷманд ба ҷойҳои бехавф кӯчонида шуда, бо хаймаҳо, ашёи рӯзгор ва маводи хӯрокворӣ таъмин карда шудаанд.

Кумакҳо дар ҳаҷми зарурӣ иборат аз семент, хишт ва тахта давоми рӯз ба минтақаҳои зарадидаи ноҳияҳои Рашту Тоҷикобод дастрас карда мешаванд.

Ёдовар мешавем, ки 13 апрел, соати 09:24 дар ҳудуди Ҷумҳурии Тоҷикистон заминларза ба амал омад. Қувваи ларзиши замин дар марказаш, ки дар километри 160-уми самти шимолу шарқ аз шаҳри Душанбе ва километри 21-уми самти шарқ аз маркази ноҳияи Рашт қарор дошт, 5-6 балл ва дар шаҳри Душанбе 3 баллро ташкил дод.