Модарони Файзобод бо дуо ва суханҳои нек муҳофизони Ватанро ба сафи Артиши миллӣ гусел намуданд

Апрель 4, 2025 12:00

ФАЙЗОБОД, 04.04.2025 /АМИТ «Ховар»/.  Дар ноҳияи Файзобод Рӯзи даъватшаванда баргузор гардид, ки зимни он зиёда  аз 80 нафар ҷавонони синни даъватӣ бо дуои неки падару модарон  ба сафи Қувваҳои Мусаллаҳи Ҷумҳурии Тоҷикистон пайваст шуданд.  Дар ин хусус ба хабарнигори минтақавии АМИТ «Ховар»  Субҳониддини Маҳмуд масъулини  Мақомоти иҷроияи ҳокимияти давлатии ноҳияи Файзобод иттилоъ доданд.

Иброз гардид,  ки   бо талошҳои пайвастаи Пешвои миллат муҳтарам Эмомалӣ Раҳмон барои фаъолияти рӯзмарраи хизматчиёни ҳарбӣ дар қисмҳои низомӣ шароити беҳтарини маишиву моддӣ муҳайё гардида, дар ҳамаи воҳидҳои низомӣ имрӯз афсарони касбии ботаҷриба барои баланд бардоштани малакаи ҳарбию ҷисмонии сарбозон ва тарбияи онҳо дар руҳияи ватандӯстию садоқат ба Ватан фаъолияти босамар менамоянд.

Хизмат ба Ватан бояд барои ҳар ҷавон ифтихору шараф бошад. Ватанро мисли модари хеш дӯст доштан ва мисли гавҳараки чашм эҳтиёт намудан қарзи ҳар ҷавонмарди ин миллат аст. Ватан муқаддастарин ганҷи ҳастӣ ва истиқлол неъмати бебаҳои миллат аст. Хизмат дар сафи Артиши миллӣ барои ҷавонон мактаби ҳаёт ва  ҷасорату мардонагӣ мебошад. Хушбахтона, ҷавонони бонанги ноҳияи Файзобод моҳияти ин суханҳоро дарк намуда,  барои адои қарзи фарзандии хеш дар назди Ватан – Модар ба сафи Артиши миллӣ ҳамроҳ шуданд.

Убайдулло Зоиров — бобои  давъватшаванда Дилшод Зоиров аз деҳаи Сари чашмаи Ҷамоати деҳоти Ҷавонон иброз дошт, ки «солҳои охир зиёд гардидани шумораи ҷавононе, ки ихтиёрӣ ба сафи Қувваҳои Мусаллаҳ мепайванданд, шоистаи таҳсин аст. Барои мисол,  ду сол пеш ман ду набераамро бо камоли ифтихор ва нангу номуси ватандӯстӣ ба сафи Артиши миллӣ равона кардам. Онҳо дар ноҳияи Мурғоби Вилояти Мухтори Кӯҳистони Бадахшон адои хизмат намуда, бо сари баланд ба хона баргаштанд.  Имрӯз набераам Дилшодро, ки дар тарбияи ман аст, бо сари баланд  ба сафи Артиши миллӣ гусел намудам.  Бояд гуфт, ки ҳоло дар қисмҳои низомии мамлакат беҳтарин шароит муҳайё гардида, фарзандони мо хуб обу тоб ёфта, ба Ватан хизмат менамоянд.  Ман  боварӣ дорам, ки набераи ман дар беҳтарин шароит хизмати Ватан-Модарро адо намуда, сарбаландона ба  деҳаамон боз мегардад.  Мо бояд фарзандони хешро барои ҳифзи Ватан, номус ва обрӯи давлату миллат тарбия намоем ва онҳоро ба сафи Артиши миллӣ  гусел карда, вазифаи шаҳрвандиямонро иҷро намоем. Мо набояд ба мисли баъзе одамон фарзандони худро аз хизмати Ватан гурезонида, ба хориҷи мамлакат фиристем. Ватанро бояд дӯст дорем ва ҳамеша дар ҳифзи он омода бошем».

Имсол аз ҳисоби Мақомоти иҷроияи ҳокимияти давлатии ноҳияи Файзобод ва Вазорати мудофиаи Тоҷикистон зиёда аз 60 нафар ҷавонони синни даъватӣ даври омӯзиши ронандагии Ташкилоти ҷамъиятии «Мададгори мудофиа» – ро  хатм намуда, ҳамчун мутахассис ба Артиши миллӣ ҷалб гардиданд.

АКС:  Мақомоти иҷроияи ҳокимияти давлатии ноҳияи Файзобод

Апрель 4, 2025 12:00

Хабарҳои дигари ин бахш

Дар Прокуратураи генералӣ Рӯзи Президентро таҷлил намуданд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро шуд
80 корманди мақомоти корҳои дохилӣ бо манзили зист таъмин мешаванд
Соли 2027 Тоҷикистон раёсатро дар Созмони Аҳдномаи амнияти дастҷамъӣ ба уҳда мегирад
Ҳабибулло Воҳидзода бо сафири навтаъйини Беларус дар Тоҷикистон мулоқот намуд
Эмомалӣ Раҳмон: «Ҳар корманди милитсия бояд бо рафтору гуфтор, дониш, самимияту эътимод сазовори боварии шаҳрвандон бошад»
Дар Роғун Рӯзи милитсияи тоҷикро таҷлил намуданд
Дар Суғд Рӯзи милитсияи тоҷикро ботантана таҷлил намуданд
Дар 26 шаҳру ноҳияи Тоҷикистон шуъбаҳои Вазорати корҳои дохилӣ бо биноҳои замонавӣ таъмин шуданд
Рӯзи милитсияи тоҷик дар Вилояти Мухтори Кӯҳистони Бадахшон ботантана таҷлил гардид
10 НОЯБР — РӮЗИ МИЛИТСИЯИ ТОҶИК. Барои беҳтар намудани шароити хизмат дар мақомоти корҳои дохилӣ беш аз 1500 иншоот бунёд гардидааст
Дар Душанбе бахшида ба Рӯзи милитсияи тоҷик ҷамъомади тантанавӣ доир шуд