Ширкати «IRS» 38 пулро навсозӣ намуд

ДУШАНБЕ, 21.04.2025. /АМИТ «Ховар»/. Ширкати «IRS» дар дарозии роҳи Душанбе-Чанок, ки 358 километрро ташкил медиҳад, 38 пулро навсозӣ намуд. Дар ин хусус ба АМИТ «Ховар» аз маркази матбуоти филиали ин ширкат хабар доданд.

Ин роҳ аз 3 нақб («Майхӯра» — 897 метр, «Истиқлол» — 4998 метр, «Шаҳристон» -5253 метр), 24 галерея ва ҳамчунин 38 пул иборат буда, онҳо навсозӣ гардиданд.

Аз ҷумла, дар километри 267 — уми роҳи Душанбе-Чанок, ки  соли 1962 сохта шуда буд, поя ва сутунҳои марказии корношоямгашта навсозӣ гардид.

Қабл аз ин «IRS» ду пули азими дигарро дар минтақаи Зарафшон бо истифода аз масолеҳи босифати сохтмонӣ пурра навсозӣ карда  буд.

Ширкати «IRS» барои дар сатҳи баланд ва ҷавобгӯ ба талаботи бахши роҳсозӣ амалӣ намудани  вазифаҳояш  имконият ва шароити зарурӣ, аз қабили мутахассисони болаёқат, корхонаҳои истеҳсоли асфалт, таҷҳизоти замонавӣ, техникаи пуриқтидорро доро буда, аз онҳо самаранок истифода мебарад. Ин омилҳо замина фароҳам оварданд, ки фаъолият дар сатҳи хубу сифати баланд амалӣ ва масъулиятшиносию дастовардҳои  кормандони он   ба ҳама маълум гарданд.

АКС:  Филиали ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон