Вазъи саломатии сокинони ноҳияҳои Рашт ва Тоҷикобод таҳти назорат қарор дорад

ДУШАНБЕ, 14.04.2025. /АМИТ «Ховар»/. Тибқи супориши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон вобаста ба  заминларзаи 13 апрел рухдода,  бартараф намудани пайомадҳои ин офати табиӣ, ҳаҷм ва роҳу воситаҳои расондани кумак ба мардум ва бартараф намудани мушкилиҳои пешомада комиссияи ҳукуматӣ сафарбар гардид.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, барои аз наздик шиносоӣ пайдо намудан бо вазъи саломатии шаҳрвандони аз заминларза осебдидаи ноҳияҳои Рашт ва Тоҷикобод намояндагони вазорат дар ин макон қарор доранд.

Намояндагони вазорат бо вазъи саломатии сокинон шинос шуда, инчунин ба онҳо дар самти риояи қоидаҳои санитарию гигиенӣ ва бехатарӣ маслиҳат ва тавсияҳо пешниҳод намуданд.

Ёдовар мешавем, ки 13 апрели соли 2025, соати 09:24 дар ҳудуди Ҷумҳурии Тоҷикистон заминларза ба амал омад. Қувваи ларзиши замин дар марказаш, ки дар масофаи 160 км самти шимолу шарқ аз шаҳри Душанбе ва 21 км самти шарқ аз маркази ноҳияи Рашт қарор дошт, 5-6 балл ва дар шаҳри Душанбе 3 баллро ташкил дод.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон