Дар Донишгоҳи миллии Тоҷикистон моҳвораи футбол оғоз гардид

ДУШАНБЕ, 02.05.2025. /АМИТ «Ховар»/.  1 май дар Донишгоҳи миллии Тоҷикистон таҳти унвони «Футбол- омили муҳимми таҳкими сулҳ ва таъмини саломатии аҳолӣ» Фестивали маърифатӣ-тарбиявӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Фестивал ба Рӯзи ҷаҳонии футбол, ки ҳамасола 25 май таҷлил мегардад, бахшида шуд.

Фестивал бо мақсади тарғиби тарзи ҳаёти солим, таҳкими робита байни устодону донишҷӯён ва арҷгузорӣ ба арзишҳои варзишӣ баргузор гардида, имконияти муфид барои ҳамгироии иҷтимоӣ ва таҳкими фарҳанги варзиш дар муҳити донишгоҳӣ мебошад.

Дар оғози фестивал иштирокчиён Осорхонаи Пешвои миллатро, ки дар ин донишгоҳ таъсис ёфтааст, тамошо намуданд.

Инчунин гӯшаи махсуси намоиши лавозимоти футбол, таҷҳизот ва асбобҳои марбут ба таърихи футбол ва фаъолияти дастаҳои донишгоҳӣ ба намоиш гузошта шуд.

Ҳамчунин бо мақсади ҷалби насли наврас ба варзиш фарзандони хурдсоли устодону кормандон дар фестивал иштирок намуданд.

Дар фестивал аз сиёсати варзишпарваронаи Президенти Ҷумҳурии Тоҷикистон муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ ёдоварӣ гардида, иброз шуд, ки  дар пайравӣ аз ин сиёсат дар Донишгоҳи миллӣ дастаи «Сомон» ташкил карда шудааст. Аъзои ин даста то имрӯз дастовардҳои гуногунро соҳиб гардидаанд.

Дар ин замина  бо мақсади ташвиқу тарғиби соҳаи варзиш озмуни донишгоҳии «Беҳтарин шеър дар васфи футбол» ва «Беҳтарин мақола дар бораи футбол» эълон гардид, ки муҳлати қабули он то 24 майи соли 2025 муқаррар гардидааст.

Ҳамчунин байни воҳидҳои сохторӣ ва факултетҳои донишгоҳ барои дарёфти «Ҷоми Ректори Донишгоҳи миллии Тоҷикистон» мусобиқаи футболи хурд баргузор мегардад.

Ёдовар мешавем, ки аз 1 то 24 май дар Донишгоҳи миллии Тоҷикистон мусобиқаҳои гуногуни варзишӣ ва чорабиниҳои маърифатию варзишӣ гузаронида мешаванд.

АКС: Донишгоҳи миллии Тоҷикистон