Дар шаҳри Хоруғ оид ба ғизои мактабӣ ҷаласа доир шуд

ДУШАНБЕ, 29.05.2025. /АМИТ «Ховар»/. Дар шаҳри Хоруғ ҷаласаи Шурои ҳамоҳангсозии байниидоравӣ оид ба ғизои мактабӣ баргузор гардид. Дар ин хусус ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ доданд.

Дар ҷаласа иттилоъ дода шуд, ки «Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022 – 2027» дар Вилояти Мухтори Кӯҳистони Бадахшон барои беҳтар намудани солимии аҳолӣ, аз ҷумла солимии кӯдакону наврасон таҳия ва қабул гардидааст.

Ҳадафи он аз таҷдиди ҳамаҷонибаи низоми ғизои мактабӣ ва инкишофи он ба устуворгардонии саломатии хонандагони муассисаҳои таҳсилоти умумӣ равона шудааст. Инчунин дар барнома сифат ва бехатарии хӯрок бо таваҷҷуҳ ба ҷанбаҳои калидии ташкили ғизои босифат ва мутавозин, аз ҷумла ҷанбаҳои технологӣ, ташкилӣ, идоракунӣ, кадрӣ, молиявӣ ва иқтисодӣ амалӣ мегардад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон