Дар Тоҷикистон беш аз 3 ҳазор тонна маҳсулоти макаронӣ истеҳсол гардидааст

ДУШАНБЕ, 13.05.2025. /АМИТ «Ховар»/. Дар семоҳаи аввали соли равон корхонаҳои мамлакат 3,2 ҳазор тонна маҳсулоти макаронӣ истеҳсол намуданд, ки нисбат ба ҳамин давраи соли 2024  18,3 фоиз ё қариб 500 тонна зиёд мебошад. Дар ин хусус  Агентии омори назди Президенти Ҷумҳурии Тоҷикистон дар  гузориш оид ба вазъи иҷтимоию иқтисодии мамлакат барои се моҳи соли равон иттилоъ додааст.

Дар Тоҷикистон раванди истеҳсоли макарон тавассути хати муосири технологӣ аз тайёр намудани хамир, башаклдарорӣ, буридани маҳсулоти хом, хушк сохтан, ҷудо намудан ва бастабандӣ кардан иборат мебошад.

Дар солҳои соҳибистиқлолии давлатӣ корхонаҳои коркарди ғалла ва истеҳсоли маҳсулоти макаронӣ бо истифода аз таҷҳизоти технологии истеҳсоли Туркия, Украина, Чин, Италия, Венгрия ва Русия таъсис ёфтанд. Инчунин фаъолияти корхонаҳои бозмонда аз нав барқарор карда шуд. Афзоиш ёфтани шумораи корхонаҳои саноатӣ ва зиёдшавии ҳаҷми истеҳсол ба пешрафти соҳаи саноат мусоидат намуд.

Ба тавсияи ғизошиносон, агар макарон дар зарфи ҳавоногузар гузошта ва дар ҷои хушк нигоҳ дошта шавад, муҳлати истеъмоли он то 8-10 сол дароз хоҳад шуд. Агар макарон ранги якхела, сафед ё зардчатоб ва бӯйи хос дошта бошад, он  босифат аст. Вале агар шикастагӣ ё майдашуда, таъмаш турш ва бӯяш ҳархела бошад, он бесифат ва ё муҳлати нигоҳдориаш гузашта мебошад.

АКС аз манбаъҳои боз