Муовини якуми Сарвазири Тоҷикистон Ҳоким Холиқзода бо муовини Сарвазири Булғористон Атанас Зафиров мулоқот намуд

ДУШАНБЕ, 29.05.2025 /АМИТ «Ховар»/. Имрӯз дар шаҳри Душанбе дар ҳошияи  Конфронси байналмилалии сатҳи баланд оид ба ҳифзи пиряхҳо ва бахшида ба Соли байналмилалии ҳифзи пиряхҳо (2025) мулоқоти муовини якуми Сарвазири Ҷумҳурии Тоҷикистон Ҳоким Холиқзода бо муовини Сарвазири Булғористон Атанас Зафиров баргузор гардид, хабар медиҳад АМИТ «Ховар».

Ҳоким Холиқзода иштироки Атанас Зафировро дар Конфронси сатҳи баланд оид ба ҳифзи пиряхҳо на танҳо баҳои баланд ба ташаббусҳои байналмилалии Тоҷикистон дар соҳаи ҳифзи муҳити зист, балки далели равшани таваҷҷуҳи Булғористон ба ҳалли мушкилоти ҳаётан муҳими ҷаҳонӣ унвон намуд.

«Мо ба тавсеаи ҳамкории дуҷониба бо Булғористон дар самтҳои мухталиф ҳавасманд ҳастем ва итминон дорем, ки дар ин самт ҳамкории муштарак байни ниҳодҳои дахлдор, аз ҷумла бахши хусусӣ таҳким хоҳад ёфт»,-иброз намуд Ҳоким Холиқзода.

Таъкид гардид, ки ҳарду давлат бояд барои зиёд кардани муомилоти мол дар муносибатҳои тиҷоратӣ бештар талош намоянд. Ташкили форумҳои тиҷоратӣ  майдони мусоид барои муттаҳид кардани соҳибкорон ва субъектҳои хоҷагидории ду давлат дар роҳи татбиқи  лоиҳаҳои нави ҳамкорӣ арзёбӣ карда шуд.

Ҳамзамон дар вохӯрӣ таъкид гардид, ки таъсиси Комиссияи доимии байниҳукуматӣ оид ба ҳамкории иқтисодӣ, тиҷоратӣ ва илмию техникӣ байни ду кишвар, инчунин мавҷудияти низоми бе раводид барои дорандагони шиносномаҳои дипломатӣ ва хизматӣ низ метавонад ба густариши минбаъдаи муколамаи созанда байни давлатҳо мусоидат намояд.

Ҷонибҳо барои  густариши ҳамкории дуҷониба дар соҳаҳои иқтисоду тиҷорат, энергетика, сармоягузорӣ ва сайёҳӣ, инчунин рушди муносибатҳои байнипарламентӣ изҳори омодагию ҳавасмандии зиёд намуданд.