РӮЗИ ҶАҲОНИИ ФУТБОЛ. Бозии нахустини Лигаи футболи Вилояти Мухтори Кӯҳистони Бадахшон доир шуд

ДУШАНБЕ, 23.05.2025 /АМИТ «Ховар»/. 22 май бахшида ба Рӯзи ҷаҳонии футбол дар Варзишгоҳи марказии шаҳри Хоруғ мусобиқаи футбол байни дастаҳои «Ҳулбук» — и ноҳияи Восеъ ва «Помир»-и Бадахшон баргузор гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон.

Тавре таъкид гардид, мусобиқа тибқи дастури Президенти Федератсияи футболи Тоҷикистон муҳтарам Рустами Эмомалӣ дар рӯзҳои таҷлили  Рӯзи ҷаҳонии футбол доир гардида, ҳаводорон ва мухлисони бозии рақами яки ҷаҳонро ба ҳам овард.

Раиси Вилояти Мухтори Кӯҳистони Бадахшон Алишер Мирзонабот оғози бозиҳои Лигаи футболи вилоятро махсус таъкид намуда, иброз дошт, ки бо дастури Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, мусоидати Ҳукумати Ҷумҳурии Тоҷикистон ва дастгирии Президенти Федератсияи футболи Тоҷикистон, Президенти Ассотсиатсияи футболи Осиёи Марказӣ  муҳтарам Рустами Эмомалӣ футболи миллӣ дар саросари Тоҷикистон, аз ҷумла вилоят рӯ ба инкишоф ниҳода, дастаи мунтахаби Вилояти Мухтори Кӯҳистони Бадахшон ташкил гардид.

Қабул гардидани қатъномаи Маҷмаи Умумии Созмони Милали Муттаҳид оид ба эълон намудани 25 май ҳамчун Рӯзи ҷаҳонии футбол саҳифаи наверо дар шаҳкитоби таърихи навини давлатдории мо, аз ҷумла таърихи варзиши он кушод.

Дар заминаи рушди варзиш давоми се соли охир дар ҳамаи шаҳру ноҳияҳои вилоят варзишгоҳҳои калон, даҳҳо майдону майдончаҳо ва толорҳои варзишӣ ба истифода дода шуда, бештари онҳо барои гузаронидани футбол, аз ҷумла футболи хурду футзал мутобиқ гардонда шудаанд.

Сипас, ҳарду даста бо маҳорати баланди варзишӣ табъи мухлисонро шод гардониданд.

Мусобиқа бо ҳисоби 2 бар 0 бо ғолибияти дастаи «Ҳулбук»-и ноҳияи Восеъ анҷом ёфт.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон