Дар Вазорати адлия бахшида ба Рӯзи Ваҳдати миллӣ ҳамоиши идона доир гардид

Июнь 26, 2025 18:10

ДУШАНБЕ, 26.06.2025 /АМИТ «Ховар»/. Ваҳдати миллӣ барои миллати сарбаланду фарзона ва мутамаддини тоҷик ба як мактаби эътимодбахшу тақдирсоз табдил ёфта, ба таври ҳамешагӣ вориди рӯзгори мо шуд ва пояҳои давлатдорию давлатсозиамонро боз ҳам таҳким бахшид. Ин нуктаро имрӯз муовини аввали Вазири адлияи Ҷумҳурии Тоҷикистон Нигина Ализода зимни баргузории  ҳамоиши идона бахшида ба 28-умин солгарди Рӯзи Ваҳдати миллӣ  иброз намуд.

Ба гуфтаи Нигина Ализода, ваҳдати миллӣ сароғози ҳамаи комёбиҳо, созандагиву ободкориҳо, ибтидои суботи сиёсиву иҷтимоӣ ва некӯаҳволии ҷомеаи навин, ҳамчунин, худогоҳиву худшиносӣ баҳри миллати соҳибмаърифати мо  гардид.

«Барои таҳким бахшидан ба ин сулҳу субот моро зарур аст, то ки зиракии сиёсии худро аз даст надода, риоя намудани Конститутсия ва қонунгузории мамлакат, ҳифзи дастовардҳои сулҳу ваҳдат, эҳтироми Ватан, ҳимоя ва таҳкими иқтидори амниятӣ ва мудофиавии он, ҳифзи арзишҳои таърихию фарҳангӣ, ҳифзи амнияти давлат, тамомияти арзии он ҳамеша саҳмгузор бошем», — афзуд Нигина Ализода.

Дар ҳамоиш ректори Донишкадаи такмили ихтисоси Вазорати адлияи Ҷумҳурии Тоҷикистон Исфандиёр Собирзода дар мавзӯи «Заковати ваҳдатофарии Пешвои миллат ҳамчун омили стратегӣ дар эҳёи давлатдории миллӣ»  маъруза  намуда, баён кард, ки сарнавишти таърихии ҳар як миллат бо рӯйдодҳо ва шахсиятҳои тақдирсоз тавъам аст, ки дар лаҳзаҳои сарнавиштсоз ва печидаи замон нақши таърихӣ мебозанд.

Исфандиёр Собирзода  иброз дошт, ки бо заковати сиёсӣ, иродаи қавӣ ва ҷаҳонбинии васеи миллӣ Президенти Ҷумҳурии Тоҷикистон муҳтарам Эмомалӣ Раҳмон  тавонистанд роҳи сулҳ, субот ва ваҳдати миллиро дар марҳалаи душвортарини таърихи кишвар  дарёфт намоянд.

«Ваҳдати миллӣ на танҳо як ормони идеологӣ, балки пояи асосии давлатдории миллии тоҷикон дар замони муосир мебошад, ки дар таҳкими он нақши Пешвои миллат чун меъмори ваҳдат калидӣ ва тақдирсоз аст», — афзуд ӯ.

Таъкид гардид, ки зарур аст, то таҷрибаи ваҳдатофарӣ ва сиёсати сулҳомез ҳамчун як қисми муҳими мероси сиёсӣ ва фарҳангии миллӣ ҳифз ва таблиғ шавад. Омӯзиши амиқи таҷрибаи Пешвои миллат, ворид намудани он ба барномаҳои таълимии муассисаҳои таҳсилоти олӣ ва таҳқиқоти илмӣ, инчунин истифода аз он дар низоми таҳия ва амалисозии сиёсати давлатӣ бояд ҳамчун вазифаи стратегӣ амалӣ гардад.

 АКС: АМИТ «Ховар»

Июнь 26, 2025 18:10

Хабарҳои дигари ин бахш

ҶАМЪБАСТИ НИШАСТҲОИ МАТБУОТӢ. 8 август дар Прокуратураи генералӣ, Вазорати молия, Кумитаи андоз, Агентии назорати давлатии молиявӣ ва мубориза бо коррупсия ва Агентии суғуртаи иҷтимоӣ ва нафақа нишасти матбуотӣ баргузор мегардад
«Анор»: Вақте шунидани овоз муҳимтар аст
Имрӯз дар Тоҷикистон ҳавои тағйирёбанда дар назар аст
Имрӯз дар вазоратҳои корҳои дохилӣ, адлия, Суди Олӣ, Хадамоти гумрук ва Палатаи ҳисоб нишасти матбуотӣ баргузор мегардад
НИШАСТИ МАТБУОТӢ. Аз корхонаҳои истеҳсолии ноҳияи Ёвон ба хориҷи мамлакат беш аз 134 ҳазор тонна семент содирот гардид
7 август дар вазоратҳои корҳои дохилӣ, адлия, Суди Олӣ, Хадамоти гумрук ва Палатаи ҳисоб нишасти матбуотӣ баргузор мегардад
Ба Тоҷикистон ба маблағи беш аз 143 миллион доллар гандум ворид карда шудааст
Ташкилоти молиявию қарзии Хатлон ба иқтисодиёт беш аз 2 миллиард сомонӣ қарзҳои бонкӣ ҷудо намудаанд
Ба Тоҷикистон ба маблағи зиёда аз 443 миллион доллар маҳсулоти нафтӣ ворид карда шудааст
Имрӯз дар Тоҷикистон ҳаво камабри бебориш мешавад
Имрӯз дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
ОБОДОНӢ ДАР ДЕҲОТ. Дар деҳаи Роҷи Панҷакент варзишгоҳи мактабӣ ба истифода дода шуд