Ҳайати Тоҷикистон дар Машварати 10-уми вазирони кишоварзии Созмони ҳамкории Шанхай иштирок намуд

ДУШАНБЕ, 31.07.2025 /АМИТ «Ховар»/. 30 июл дар шаҳри Кумини Ҷумҳурии Мардумии Чин Машварати 10-уми вазирони кишоварзии давлатҳои аъзои Созмони ҳамкории Шанхай доир гардид, ки дар он Вазири кишоварзии Ҷумҳурии Тоҷикистон Қурбон Ҳакимзода иштирок намуд. Дар ин хусус АМИТ «Ховар» бо истинод ба Вазорати кишоварзии Ҷумҳурии Тоҷикистон иттилоъ медиҳад.

Зимни машварат ҷонибҳо масъалаҳои таъмини амнияти озуқаворӣ, мубориза бар зидди пайомадҳои тағйирёбии иқлим, хушксолӣ ва биёбоншавӣ, паст намудани сатҳи камбизоатӣ, гузариш ба роҳҳои инноватсионии парвариши зироати кишоварзӣ, истеҳсоли маҳсулоти органикӣ, ба роҳ мондани даври пурраи коркарди маҳсулоти кишоварзӣ, пешбурди тиҷорати электронӣ ва кишоварзии ҳушманд, рафъи монеаҳои содироту воридоти маҳсулоти озуқаворӣ, таҳкими ҳамкорӣ дар самти фитосанитарию карантини растанӣ, селексия, тухмипарварӣ ва биотехнология, дастгири доираҳои илмӣ ва бахши хусусиро баррасӣ намуданд.

Иштирокчиён вобаста ба тағйирёбии иқлим, тиҷорати маҳсулоти кишоварзӣ, коркард ва татбиқи муштараки технологияи аграрии муосир, амалӣ намудани ташаббусҳои кишварҳои аъзо дар самти таъмини амнияти озуқаворӣ, дастгирӣ ва фароҳам овардани шароити мусоид ба доираҳои соҳибкорӣ, ҳарчи бештар сармоягузорӣ намудани корхонаҳои коркарди маҳсулот, рушди соҳаи моҳипарварӣ ва пешбурди корҳои селексионӣ табодули афкор намуданд.

Дар машварат ҳамзамон оид ба масоили устувор намудани соҳаи кишоварзии давлатҳои аъзои Созмони ҳамкории Шанхай нисбат ба  пайомадҳои баъдӣ, рушди устувори логистикӣ ва занҷираи арзиши иловашуда, таъсиси низоми ягонаи огоҳонидани бармаҳал, мубориза бар зидди касалию ҳашароти зараррасони сарҳадгузар ва дигар масъалаҳои марбут ба рушди кишоварзии «сабз» ибрози андеша карда шуд.

АКС: Вазорати кишоварзии Ҷумҳурии Тоҷикистон