Бахшида ба ворид шудани дараи Алмосӣ ба Низоми мероси кишоварзии дорои аҳамияти ҷаҳонӣ дар Ҳисор ҳамоиши ҷумҳуриявӣ доир шуд

ДУШАНБЕ, 29.07.2025 /АМИТ «Ховар»/. Бахшида ба ворид шудани дараи Алмосӣ, гӯсфанди зоти ҳисорӣ ва ангури тойифии гулобӣ ба Низоми мероси кишоварзии дорои аҳамияти ҷаҳонӣ дар шаҳри Ҳисор дар мавзуи «Гӯсфанди зоти ҳисорӣ ва ангури тойифии гулобӣ- мероси миллии Ҷумҳурии Тоҷикистон» ҳамоиши илмӣ-амалии ҷумҳуриявӣ баргузор гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад.

Вазорати кишоварзии Ҷумҳурии Тоҷикистон, Академияи илмҳои кишоварзии Ҷумҳурии Тоҷикистон, Донишгоҳи аграрии Тоҷикистон ва Мақомоти иҷроияи ҳокимияти давлатии шаҳри Ҳисор аз созмондиҳандагони ҳамоиш буданд.

Дар ҳамоиш олимону коршиносони соҳаи кишоварзӣ ва чорводорӣ дар мавзуъҳои «Низоми мероси кишоварзии дорои аҳамияти ҷаҳонӣ», «Зоти гӯсфанди ҳисорӣ: ҳолат, дастовард ва дурнамои парвариши он», «Навъу намунаҳои ангури Тоҷикистон ва рушди соҳаи токпарварӣ» маъруза намуданд.

Дар доираи ҳамоиш олимони соҳа ва меҳмонон ҳамзамон бо токзори хоҷагиҳои деҳқонии ҳудуди Ҷамоати деҳоти Алмосӣ, ки бо усули бобоӣ ва ҳозиразамон бунёд ёфтаанд, намоиши гӯсфанди зоти ҳисорӣ, ки чорводорони шаҳр баргузор намуданд ва ҳунарҳои мардумию намунаи таом ва пухтупази миллии кадбонуҳои шаҳри Ҳисор шинос гардиданд.

Дараи Алмосии шаҳри Ҳисори Ҷумҳурии Тоҷикистон дар байни ҷумҳуриҳои Иттиҳоди Давлатҳои Мустақил ягона маконест, ки аз ҷониби Созмони озуқа ва кишоварзии Созмони Милали Муттаҳид ба «Низоми мероси кишоварзии дорои аҳамияти ҷаҳонӣ» ворид гардидааст.

Бояд гуфт, ки ба низоми мероси кишоварзии Созмони озуқа ва кишоварзии Созмони Милали Муттаҳид мавзеъҳое дохил мегарданд, ки онҳо аз ҷиҳати кишоварзӣ, гуногунии биологӣ ва фарҳангӣ аз дигар мавзеъҳо фарқ доранд.

Дараи Алмосӣ, ки дар минтақаи кӯҳии шаҳри Ҳисор ҷойгир аст, низоми кишоварзии нодиреро ташкил медиҳад, ки дар он чорводорӣ ва парвариши зироати кишоварзӣ якҷоя амал мекунанд. Дар ин ҷо навъҳои маҳаллии гандум, ҷав, сабзавот ва ангур, бахусус тойифии гулобӣ парвариш меёбанд, ки аз он шарбату мавиз ва нӯшокиву шароб истеҳсол менамоянд. Ҳамчунин дар минтақа гӯсфандони зоти ҳисорӣ, ки ба шароити сахти иқлим мутобиқанд, парваришу нигоҳубин карда мешаванд.

АКС: Мақомоти иҷроияи ҳокимияти давлатии шаҳри Ҳисор