Дар Гулистон Слёти III байнидавлатии нозирони навраси ҳаракати давлатҳои аъзои ИДМ доир мешавад

ДУШАНБЕ, 14.07.2025 /АМИТ «Ховар»/. Аз 15 то 20 июл дар шаҳри Гулистони вилояти Суғд Слёти III байнидавлатии нозирони навраси ҳаракати давлатҳои аъзои Иттиҳоди Давлатҳои Мустақил баргузор мегардад. Дар ин хусус ба АМИТ «Ховар» аз Вазорати корҳои дохилии Ҷумҳурии Тоҷикистон хабар доданд.

Слёт 16 июл дар «Кохи Рӯдакӣ»-и шаҳри Хуҷанд оғоз меёбад.

Дар озмун 7 дастаи нозирони навраси ҳаракат аз ҷумҳуриҳои Тоҷикистон, Озарбойҷон, Беларус, Қазоқистон, Қирғизистон, Федератсияи Русия ва Узбекистон иштирок менамоянд.

Иштирокчиёни дастаҳо аз рӯи намудҳои «Азназаргузаронии сафороӣ», «Донишмандони қоидаҳои ҳаракат дар роҳ», «Чархи амонӣ», «Танзимгари наврас», «Дастаи ман», «Гурӯҳҳои ташвиқотӣ», «Пурдонҳо» ва «Тарғибгари наврас»  байни ҳам қувваозмоӣ менамоянд.

Озмун бо мақсади ҷоннок намудани  корҳои ташвиқотию тарғиботӣ, пешгирии ҳодисаҳои нохуши нақлиётӣ ва омӯзиши ҳарчи бештари қоидаҳои ҳаракат дар роҳ байни  ноболиғон гузаронида мешавад.

АКС: Вазорати корҳои дохилии Ҷумҳурии Тоҷикистон