Дастаи Академияи футболи ФФТ дар Мусобиқаи «Ҷоми Қошғар» сазовори ҷои дуюм гардид

ДУШАНБЕ, 02.07.2025 /АМИТ «Ховар»/. Дастаи Академияи футболи Федератсияи футболи Тоҷикистон (U-15) дар Мусобиқаи байналмилалии «Ҷоми Қошғар» байни наврасон, ки дар Чин баргузор шуд, мақоми дуюмро сазовор гашт.

Тавре ба АМИТ «Ховар» аз Федератсияи футболи Тоҷикистон хабар доданд, мусобиқа дар Шинҷон-Уйғур дар шимолу ғарби Чин баргузор шуд. Барои медалҳо 12 даста аз 7 кишвар – Тоҷикистон, Чин, Русия, Қазоқистон, Қирғизистон, Туркманистон ва Узбекистон мубориза бурданд.

Дастаи Академияи футболи Федератсияи футболи Тоҷикистон дар марҳилаи гурӯҳии мусобиқот бар тими «Синзян Юэпуҳу»-и Чин (9:0) ва «Қувватли Беден»-и Туркманистон (4:0) ғалаба намуда, аз тими «Шандун Тайшан»-и Чин шикаст хӯрд (0:4).

Наврасони мо дар даври чорякниҳоӣ бар дастаи Академияи «Сибир» (3:3, аз рӯйи силсилаи пеналтӣ – 5:3) ғолиб омада, дар нимниҳоӣ бар бошгоҳи Академияи футболи Тошканд (0:0, аз рӯйи пеналти – 6:5) пирӯз гардиданд.

Дар бозии ниҳоии мусобиқот дастаи Академияи футболи ФФТ аз тими «Бейтзин Гоан»-и Чин (2:2, аз рӯи пеналти – 5:6) шикаст хӯрд ва ҷойи  дуюмро  соҳиб гашт.

 АКС: Федератсияи футболи Тоҷикистон