Коршиносони ИДМ лоиҳаи Нақшаи чорабиниҳо бахшида ба 35-солагии Иттиҳодро мувофиқа намуданд

ДУШАНБЕ, 19.07.2025 /АМИТ «Ховар»/. 16 июл дар қароргоҳи Иттиҳоди Давлатҳои Мустақил ҷаласаи гурӯҳи коршиносон оид ба мувофиқанамоии лоиҳаи Нақшаи чорабиниҳо бахшида ба 35-солагии таъсиси Иттиҳоди Давлатҳои Мустақил баргузор шуд. Дар ин хусус ба АМИТ «Ховар» аз маркази матбуоти Кумитаи иҷроияи Иттиҳоди Давлатҳои Мустақил хабар доданд.

Коршиносон таклифҳо оид ба лоиҳаи нақшаро баррасӣ намуда, бо назардошти муҳокимаи доиршуда ин ҳуҷҷатро маъқул донистанд.

Карор дода шуд, ки он бо тартиби муқарраршуда ба баррасии Шурои иқтисодии Иттиҳоди Давлатҳои Мустақил пешниҳод карда шавад.

Ба лоиҳаи нақша даҳҳо модда дохил карда шудаанд, ки ба амал баровардани якчанд тадбирҳои ташкилӣ, илмию амалӣ, инчунин чорабиниҳои самтҳои иқтисодӣ ва гуманитариро пешбинӣ менамоянд.

Баргузории ҷаласаи солонаи Шурои сарони кишварҳои аъзои Иттиҳоди Давлатҳои Мустақил бо қабули Изҳорот ба муносибати 35- солагии таъсиси Иттиҳоди Давлатҳои Мустақил, баргузории «Ҳафтаи ИДМ» дар кишварҳои Иттиҳод, омода ва пахши барномаҳои телевизионӣ ва филмҳои мустанад бахшида ба ин ҷашн, ташкил ва гузаронидани Форуми зиёиёни эҷодкор ва илмии давлатҳои аъзои Иттиҳоди Давлатҳои Мустақил, дарси ягона дар муассисаҳои таълимӣ, намоишу экспозитсияҳо, бозиҳо ва мусобиқаҳо оид ба намудҳои гуногуни варзиш аз ин ҷумлаанд.

АКС: маркази матбуоти Кумитаи иҷроияи Иттиҳоди Давлатҳои Мустақил