НИШАСТИ МАТБУОТӢ. Саридораи геология ба 68 хоҷагӣ ва 1 муассисаи таҳсилоти миёнаи умумӣ тавсия додааст, ки ба маконҳои бехатар кӯч банданд

ДУШАНБЕ, 22.07.2025 /АМИТ «Ховар»/. Дар шашмоҳаи якуми соли равон тибқи лоиҳаи «Хадамоти давлатии мушоҳидаи равандҳои экзогении геологӣ» аз ҷониби кормандони Саридораи геологияи назди Ҳукумати Ҷумҳурии Тоҷикистон дар 347 деҳа, маҳалла ва шаҳракҳои ҳудуди шаҳру ноҳияҳои тобеи ҷумҳурӣ, вилоятҳои Хатлон ва Суғд таҳқиқоти муҳандисӣ-геологӣ гузаронида шуд. Дар натиҷа ба 68 хоҷагӣ ва 1 муассисаи таҳсилоти миёнаи умумӣ барои аз ҷойҳои хавфнок ба ҷойҳои бехавф кӯчидан пешниҳод манзур гардид. Дар ин хусус имрӯз зимни нишасти матбуотӣ сардори Саридораи геологияи назди Ҳукумати Ҷумҳурии Тоҷикистон Илҳомҷон Оймуҳаммадзода ба хабарнигорон иттилоъ дод.

Инчунин иттилоъ дода шуд, ки дар доираи лоиҳаи «Ҷустуҷӯи обҳои зеризаминӣ барои бо об таъмин намудани объектҳои тандурустӣ, маориф ва таъминоти иҷтимоии ҷумҳурӣ» дар ҳудуди ҷумҳурӣ 3 пармачоҳ бо жарфи умумии 220 метр парма карда шуд.

«Муҳофизати меҳнат ва техникаи бехатарӣ дар корхонаҳои воҳидӣ тибқи тартиби муқарраргардида аз рӯи нақшаи пешбурди корҳо ва талаботи бехатарии корҳои иктишофи геологӣ ба роҳ монда шудаанд. Дар ин давра ягон ҳодисаи нохуш, риоя накардани талаботи ҳифзи меҳнат ва қоидаҳои дохилии корхонаҳо ба қайд гирифта нашудааст»,-иброз дошт Илҳомҷон Оймуҳаммадзода.

Моҳинави НАВРӮЗ,
Тоҳири САИД (АКС),
АМИТ «Ховар»