НИШАСТИ МАТБУОТӢ. Сокинони Лахш дар 5507 гектар картошка кишт намудаанд

ЛАХШ, 30.07.2025 /АМИТ «Ховар»/. Мувофиқи маълумоти оморӣ, сокинони ноҳияи Лахш имсол дар ҳамаи шаклҳои хоҷагидорӣ, яъне дар 5507 гектар заминҳои наздиҳавлигӣ, хоҷагиҳои деҳқонӣ ва заминҳои хоҷагии ёрирасон картошка, дар 893 гектар зироати ғалладонагӣ, дар 3 гектар зироати техникӣ, дар 99 гектар сабзавот ва дар 1558 гектар зироати хӯроки чорво кишт намудаанд. Ин матлабро Раиси ноҳияи Лахш Каромиддин Холзода зимни нишасти матбуотӣ баён дошт.

Иттилоъ дода шуд, ки аз шумораи 5507 гектар кишти картошка 3300 гектари он дурнамои кишти картошка дар сохтори кишоварзӣ мебошад. Ҳоло майдонҳои кишти картошка бо оби полезӣ пурра таъмин буда, нашъунамои он хуб мебошад. Кишоварзони ноҳия имрӯзҳо ба давраи сеюм ва чоруми ғизодиҳии картошка машғул мебошанд. Умед аст, ки кишоварзони ноҳия ҳосили фаровони картошка рӯёнида, дар таъмини амнияти озуқавории ҷумҳурӣ саҳми арзанда мегузоранд.

Дар шаш моҳи соли равон аз ҷониби низоми бонкии ноҳия барои рушди соҳаҳои мухталифи иқтисодию иҷтимоӣ ва кишоварзии ноҳия беш аз 13,1 миллион сомонӣ қарз дода шудааст, ки 3,9 миллион сомонии ин маблағ ба соҳаи картошкапарварӣ равона шудааст.

Тавре зимни нишасти матбуотӣ иброз гардид, барои дар сатҳи баланд таҷлил намудани ҷашни бузурги миллӣ- 35-солагии Истиқлоли давлатии Ҷумҳурии Тоҷикистон дар ноҳияи Лахш сохтмони 124 иншооти дорои аҳамияти гуногун ба нақша гирифта шудааст. То имрӯз 68 иншоот мавриди истифода қарор гирифта, дар 56 иншооти боқимонда сохтмон ва лоиҳакашӣ идома дорад.

Имрӯзҳо бо дастгирии Ҳукумати Ҷумҳурии Тоҷикистон, вазорату идораҳои ҷумҳурӣ ва шарикони рушд сохтмони қасри фарҳанг, бинои адлия, Маркази бехатарии озуқаворӣ, бинои маъмурии шабакаҳои барқ, Муассисаи таҳсилоти миёнаи умумии №10, идомаи корҳои кашидани хати оби нӯшокӣ дар маркази ноҳия ва дигар иншооти хизматрасонӣ босуръат идома дорад.

Субҳониддини МАҲМУД,
АМИТ «Ховар»

АКС: АМИТ «Ховар»