Ҷаласаи чоруми Гурӯҳи кории ҷумҳуриявӣ дар самти рушди сайёҳӣ доир шуд

ДУШАНБЕ, 18.08.2025. /АМИТ «Ховар»/. 15 август дар ноҳияи Дарвози Вилояти Мухтори Кӯҳистони Бадахшон таҳти роҳбарии Муовини Сарвазири Ҷумҳурии Тоҷикистон Дилрабо Мансурӣ ҷаласаи чоруми Гурӯҳи кории ҷумҳуриявӣ дар самти рушди сайёҳӣ, ҳунарҳои мардумӣ ва корҳои ободонию сабзазоркунӣ баргузор гардид. Дар ин хусус АМИТ «Ховар» бо истинод ба Кумитаи рушди сайёҳии назди Ҳукумати Ҷумҳурии Тоҷикистон хабар медиҳад.

Дар ҷаласа намояндагони мақомоти иҷроияи ҳокимияти давлатӣ, сохторҳои дахлдор ва аъзои гурӯҳи корӣ иштирок намуданд.

Дар ҷаласа Раиси Кумитаи рушди сайёҳӣ Ҷамшед Ҷумъахонзода натиҷаҳои иҷрои қарори қаблӣ ва нақшаи чорабиниҳои тасдиқгардидаро мавриди баррасӣ қарор дод.

Ҳамзамон аз ҷониби роҳбарияти Мақомоти иҷроияи ҳокимияти давдатии Вилояти Мухтори Кӯҳистони Бадахшон ва ноҳияи Дарвоз ҳисобот оид ба рушди инфрасохтори сайёҳӣ, беҳтар намудани сатҳу сифати хизматрасонӣ, рушди ҳунарҳои мардумӣ, татбиқи лоиҳаҳои сабзазоркунӣ ва ташкили чорабиниҳои фарҳангию сайёҳӣ пешниҳод гардид.

Дар ҷаласа натиҷаҳои мусбати баргузории Фестивали байналмилалии «Наврӯз – мероси фарҳангию ҷаҳонгардӣ» ва омодагӣ ба Форуми муштараки сармоягузории ҷаҳонии сайёҳӣ таъкид карда шуданд.

АКС: Кумитаи рушди сайёҳии назди Ҳукумати Ҷумҳурии Тоҷикистон