Дар асоси қарори Раиси шаҳри Душанбе дар пойтахт намоишгоҳи фурӯши либосҳои мактабӣ ва лавозимоти дарсӣ оғоз гардид

ДУШАНБЕ, 01.08.2025. /АМИТ «Ховар»/. Дар асоси қарори Раиси шаҳри Душанбе дар пойтахт ва ноҳияҳои он намоишгоҳи фурӯши либосҳои мактабӣ ва лавозимоти дарсӣ оғоз гардид. Дар ин хусус ба АМИТ «Ховар» аз Сарраёсати маорифи шаҳри Душанбе хабар доданд.

Намоишгоҳи фурӯши либосҳои мактабӣ ва лавозимоти дарсӣ дар ноҳияи Исмоили Сомонӣ дар Ҷамъияти дорои масъулияти маҳдуди Маркази савдои «Истиқлол», Ҷамъияти дорои масъулияти маҳдуди «Чеварони Лола» ва Ҷамъияти саҳомии кушодаи «Гулистони Душанбе» доир мешавад.

Намоишгоҳи фурӯши либосҳои мактабӣ ва лавозимоти дарсӣ дар ноҳияи Шоҳмансур дар кӯчаи Валаматзода 8 (назди бинои Мақомоти иҷроияи ҳокимияти давлатии ноҳияи Шоҳмансур), хиёбони Рӯдакӣ 10 (назди Маркази савдои «Садбарг» ва «Шукрона»), кӯчаи Айнӣ 307/5, Маркази савдои «Ховарон» ва Маркази савдои «Гелос», кӯчаи А. Лоҳутӣ 4/33 доир карда мешавад.

Дар ноҳияи Фирдавсӣ намоишгоҳ дар Ҷамъияти дорои масъулияти маҳдуди бозори «Корвон», Ҷамъияти дорои масъулияти маҳдуди бозори «Корвон плюс», Ҷамъияти дорои масъулияти маҳдуди «Фаёз-2015», Ҷамъияти дорои масъулияти маҳдуди «Дунёи нав АСК», Ҷамъияти дорои масъулияти маҳдуди Иттиҳодияи истеҳсолии «Нассоҷии Тоҷик» ва Маркази савдои «Ганҷина» баргузор мешавад.

Намоишгоҳи фурӯши либосҳои мактабӣ ва лавозимоти дарсӣ дар Маркази савдои «Панҷшер» низ доир карда мешавад.

Намоишгоҳи фурӯши либосҳои мактабӣ ва лавозимоти дарсӣ дар ноҳияи Сино дар Ҷамъияти дорои масъулияти маҳдуди «Сафариён» (дохили бозор) баргузор мегардад.

Бояд гуфт, ки корхонаю коргоҳҳои дӯзандагии мамлакат дӯхти либоси мактабиро дар асоси талаботи Дастурамали либосҳои тавсиявӣ барои хонандагони муассисаҳои таҳсилоти умумӣ, ки аз ҷониби Вазорати маориф ва илм таҳия шудааст, ба роҳ мондаанд. Дастурамали мазкур соли 2007 ба тасвиб расида, ба тамоми корхонаҳои истеҳсолӣ пешниҳод гардидааст. Аз моҳи январи соли 2018 инҷониб Стандарти давлатии «Либоси мактабӣ» қабул гардида, корхонаҳои соҳа бо риояи талаботи ин стандарт либосҳои мактабӣ истеҳсол менамоянд.

Хариди либосҳои ягонаи мактабӣ аз корхонаҳои саноатии ҳудуди шаҳри Душанбе ба рушди саноати пойтахт, таъсиси ҷойи нави кор ва ба ин васила беҳтар гардидани шароити кору зиндагии мутахассисони ин корхонаҳо заминаи мусоид фароҳам меоварад.

Масъалаи таъмини хонандагон бо либосҳои мактабии истеҳсоли ватанӣ муҳим арзёбӣ гардида, Президенти Ҷумҳурии Тоҷикистон муҳтарам Эмомалӣ Раҳмон ба он таваҷҷуҳи махсус зоҳир менамоянд. Сарвари давлат бо назардошти имтиёзҳои андозиву гумрукии аз ҷониби Ҳукумати мамлакат пешбинигардида ҳамеша масъулин ва роҳбарони корхонаҳои дӯзандагиро вазифадор менамоянд, ки истеҳсоли чунин либосҳоро дар ҷумҳурӣ афзоиш дода, хонандагонро бо либосҳои хушсифати арзон таъмин намоянд.

Ба иттилои масъулин, дар миқёси пойтахт иқтидори корхонаҳои дӯзандагӣ барои пурра таъмин намудани хонандагон бо либоси мактабӣ басанда буда, имконияти истеҳсоли либоси мактабӣ дар корхонаҳо давоми сол ба таври комил фароҳам оварда шудааст. Ин имкон медиҳад, ки хонандагон пурра бо маҳсулоти воридотивазкунандаи хушсифат таъмин гарданд.

АКС: АМИТ «Ховар»