Дар шаҳри Панҷакент Ниммарафони байналмилалии экологии кӯҳии «Seven Lakes» доир мегардад

ДУШАНБЕ, 01.08.2025 /АМИТ «Ховар»/. 2-3 августи соли 2025 дар шаҳри Панҷакент Ниммарафони байналмилалии экологии кӯҳии «Seven Lakes» дар масофаҳои 3, 10 ва 21 км гузаронида мешавад, ки ҳадафаш рушди варзиш ва тарғиби тарзи ҳаёти солим дар ҷомеа мебошад. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Кумитаи ҳифзи муҳити зисти назди Ҳукумати Ҷумҳурии Тоҷикистон, Ассотсиатсияи дав ва марафонҳои Тоҷикистон ва Кумитаи ҷавонон ва варзиши назди Ҳукумати Ҷумҳурии Тоҷикистон аз созмондиҳандагони Ниммарафони байналмилалии экологии кӯҳии «Seven Lakes» мебошанд.

Ниммарафони байналмилалии экологии кӯҳии «Seven Lakes» танҳо мусобиқаи варзишӣ набуда, балки иқдом барои ҳифзи табиат, саломатӣ ва таҳкими ваҳдати миллӣ арзёбӣ мегардад. Ниммарафони байналмилалӣ варзишгарон ва дӯстдорони варзиши намуди давро аз минтақаҳои гуногуни Тоҷикистон ва кишварҳои хориҷӣ ҷамъ меорад.

Инчунин дар доираи Ниммарафони байналмилалии экологии кӯҳии «Seven Lakes» дар мавзеи Ҳафткӯл ҳашари экологии тоза намудани соҳили кӯлҳо гузаронида мешавад. Ҳадафи он баланд бардоштани маърифати экологии шаҳрвандон ва ҳифзи муҳити зист мебошад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон