Дар вохӯрии дастаҳои Тоҷикистон ва Ҳиндустон автомобили BYD ба бозӣ гузошта мешавад

ДУШАНБЕ, 20.08.2025 /АМИТ «Ховар»/. Мусобиқаи «Ҷоми миллатҳои CAFA-2025» аз 29 август то 8 сентябри соли 2025 баргузор мешавад, ки дар он дастаи мунтахаби Ҳиндустон дар мусобиқаи дуюми байналмилалии «CAFA Nations Cup 2025» дар гурӯҳи «В» бо дастаҳои мунтахаби Тоҷикистон, Эрон ва Афғонистон рақобат менамояд. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Ба гурӯҳи «А» дастаҳои мунтахаби Узбекистон, Қирғизистон, Туркманистон ва Уммон дохиланд. Бозиҳои гурӯҳи «А» дар шаҳри Тошканди Ҷумҳурии Узбекистон ва гурӯҳи «В» дар шаҳри Ҳисори Ҷумҳурии Тоҷикистон доир мегарданд.

29 августи соли 2025 дар Варзишгоҳи марказии шаҳри Ҳисор бозии ифтитоҳии мусобиқаи «CAFA Nations Cup 2025» дар гурӯҳи «В» байни дастаҳои мунтахаби Тоҷикистон ва Ҳиндустон баргузор мешавад. Барои мухлисоне, ки чиптаи ин бозиро мехаранд, туҳфаи арзишманд– автомобили BYD E2 омода шуда, ба бозӣ гузошта мешавад. Пеш аз оғози вохӯрӣ мухлисони футбол ва тамошобинонро барномаи рангини консертии идона бо иштироки ситораҳои эстрадаи тоҷик интизор аст.

Мусобиқа соати 20:00 оғоз шуда, баъд аз он бозии дастаҳои мунтахаби Тоҷикистон ва Ҳиндустон доир мегардад. Чиптаҳоро барои ҳамаи бозиҳои гурӯҳи «В»-и мусобиқаи «CAFA Nations Cup 2025» метавонед аз платформаи echipta.tj харидорӣ намоед. Нархи як чипта 30 сомонӣ мебошад.

Баъдан футболбозони тоҷик 1 сентябр бо дастаи мунтахаби Афғонистон ва 4 сентябр бо дастаи мунтахаби Эрон рақобат мекунанд. Тибқи муқаррароти Ҷоми миллатҳои CAFA-2025, бозиҳои марҳилаи гурӯҳӣ дар шакли даврӣ баргузор мешаванд. Сипас ғолибони гурӯҳҳо дар финал байни ҳам вомехӯранд. Дастаҳое, ки дар гурӯҳҳои худ ҷойи дуюмро мегиранд, барои ҷойи сеюм мубориза мебаранд. Бозии ниҳоии мусобиқа дар шаҳри Тошканд ва бозӣ барои ҷойи сеюм дар шаҳри Ҳисор доир карда мешавад.

АКС: Федератсияи футболи Тоҷикистон