Дар Душанбе омодагӣ ба Конфронси навбатии Осиёи Марказӣ оид ба тағйирёбии иқлим баррасӣ шуд

ДУШАНБЕ, 03.09.2025 /АМИТ «Ховар»/. Муҳиммияти мутобиқсозии ташаббусҳои экологии «сабз» бо афзалияти миллӣ ва минтақавӣ дар мулоқоти Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо директори Маркази минтақавии экологии Осиёи Марказӣ Батир Мамедов баррасӣ гардид. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Ҷонибҳо иброз доштанд, ки Маркази минтақавии экологии Осиёи Марказӣ якчанд лоиҳаи муҳими минтақавӣ, аз қабили «RESILAND CA+», «One Health» ва «Blue Peace»-ро бо дастгирии молиявии Бонки ҷаҳонӣ амалӣ менамояд. Лоиҳаҳо бахшҳои марбут ба Тоҷикистонро низ дар бар гирифта, ба таҳкими иқтидори миллӣ мусоидат менамоянд.

Ҳамкорӣ бо муассисаҳои таҳсилоти олӣ ва шарикони техникӣ дар Тоҷикистон низ густариш меёбад. Ҷонибҳо барои тақвияти ҳамгироии минтақавӣ дар сатҳи миллӣ изҳори омодагӣ намуданд. Гуфта шуд, ки дар айни замон чорабинии муҳиме дар чаҳорчӯби лоиҳаи «One Health» дар марҳилаи омодагӣ қарор дорад. Аз ҷумла, ҷонибҳо аҳамияти Конфронси навбатии Осиёи Марказӣ оид ба тағйирёбии иқлимро мавриди таваҷҷуҳ қарор дода, ба он изҳори омодагӣ намуданд.

Мавзуи ҷалби сармоягузориҳои «сабз», ки ба рушди устувор ва муҳофизати муҳити зист дар кишварҳои минтақа, аз ҷумла Тоҷикистон равона шудааст, ҳамчун бахши калидии гуфтугӯ баррасӣ гардид.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон