Парлумонҳои Тоҷикистон ва Эрон дар рушди ҳамкории дуҷониба нақши муассир доранд

ДУШАНБЕ, 01.09.2025 /АМИТ «Ховар»/. 30 август мулоқоти Сафири Фавқулода ва Мухтори Ҷумҳурии Тоҷикистон дар Эрон Низомиддин Зоҳидӣ бо мушовир, дастёри махсуси Раиси Маҷлиси шурои исломии Эрон дар умури байналмилалӣ Абулфазли Амуӣ баргузор гардид.

Тавре ба АМИТ «Ховар» аз Сафорати Тоҷикистон дар Теҳрон хабар доданд, зимни мулоқот таъкид гардид, ки парлумонҳои ду давлат дар рушди равобити дуҷониба ва фароҳам овардани заминаи ҳуқуқию қарордодии муносибатҳои дуҷониба нақши муассир доранд.

Вобаста ба  ин, нақши муҳими сафари расмии Раиси Маҷлиси Миллии Маҷлиси Олии Ҷумҳурии Тоҷикистон муҳтарам Рустами Эмомалӣ ба Эрон дар таърихи 8-9 январи соли 2024 ва сафари Раиси Маҷлиси Шурои исломии Эрон Муҳаммадбоқир Қолибоф ба Тоҷикистон дар таърихи 9-10 октябри соли 2024 дар густариши равобити байнипарлумонии ду мамлакат таъкид гардид.

Мусоҳибон ҳамчунин доир ба саҳми гурӯҳҳои дӯстии байнипарлумонӣ дар равобити парлумонҳои ду мамлакат ибрози андеша намуда, табодули сафарҳои ин гурӯҳҳоро ба нафъи муносибатҳои Тоҷикистону Эрон донистанд.

АКС: Сафорати Тоҷикистон дар Теҳрон