Тақвияти ҳамкории Бонки миллии Тоҷикистон бо ширкати «Al Fardan Exchange» баррасӣ карда шуд

ДУШАНБЕ, 26.09.2025 /АМИТ «Ховар»/. Ҳадафи асосии Бонки миллии Тоҷикистон таъмини суботи пулию молиявӣ, таҳкими устувории низоми бонкӣ ва фароҳам овардани шароити мусоид барои рушди устувори иқтисодӣ буда, роҳбарияти бонк ба ҳамкории стратегӣ бо шарикони байналмилалӣ аҳаммияти махсус медиҳад. Ин нукта зимни мулоқоти муовини Раиси Бонки миллии Тоҷикистон Далер Муродализода бо намояндаи ширкати «Al Fardan Exchange»-и Аморати Муттаҳидаи Араб Ҳасан Ҷобир ал Фардан дар Душанбе иброз гардид. Дар ин хусус АМИТ «Ховар» бо истинод ба Бонки миллии Тоҷикистон иттилоъ медиҳад.

Мусоҳибон дар мулоқот дурнамои самтҳои ҳамкориро баррасӣ намуданд. Таъкид гардид, ки дар марҳилаи кунунӣ яке аз самтҳои афзалиятноки фаъолият густариши ҳамкорӣ дар бахши муомилоти асъор ва амалиёт бо пули нақд мебошад. Дар ин замина ҳамкории наздик бо ширкати «Al Fardan Exchange» метавонад ба рушди воситаҳои муосири пардохт, тақвияти робитаҳои тиҷоратию сармоягузорӣ байни Тоҷикистон ва бозорҳои байналмилалӣ, инчунин таҳкими устуворӣ ва рақобатпазирии низоми бонкии мамлакат мусоидат намояд.

Директори иҷроияи ширкати «AlfaNow»- зергурӯҳи ширкати «Al Fardan Exchange» Ҳасан Ҷобир ал Фардан низ барои ба роҳ мондани ҳамкории судманд дар бахшҳои хизматрасонии молиявӣ, интиқоли маблағ, беҳсозии инфрасохтори низоми пардохт ва тавсеаи дастрасии молиявӣ изҳори ҳавасмандӣ намуд.

Ҷонибҳо инчунин доир ба имконияти васеи ҳамкорӣ дар самти мубодилаи таҷрибаи беҳтарин ва дигар масъалаҳои низоми бонкӣ табодули назар карданд.

Бояд гуфт, ки «Al Fardan Exchange» яке аз ширкатҳои бонуфузи байналмилалӣ буда, беш аз 50 сол аст, ки дар бозори байналмилалӣ фаъолият менамояд ва дар бахши хизматрасонии интиқоли маблағ ва муомилоти асъор таҷрибаи бой дорад.

АКС: Бонки миллии Тоҷикистон