«ТАСАЛЛО». Барои кӯдакони гирифтори бемории саратон шуъбаи махсус ифтитоҳ гардид

ДУШАНБЕ, 19.09.2025. /АМИТ «Ховар»/. Дар Муассисаи давлатии «Маркази ҷумҳуриявии илмии саратоншиносӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Тоҷикистон таҳти унвони «Тасалло» шуъбаи кӯдакона ба истифода дода шуд.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, ин шуъба ба кӯдакони гирифтори бемории саратон хизмат мерасонад.

Шуъба бо ташаббуси муассиси Фонди хайриявии «Лона» муҳтарам Раҳмон Озода Эмомалӣ таъсис дода шудааст.

Директори Маркази ҷумҳуриявии илмии саратоншиносӣ иброз дошт, ки дар ин шуъба ба кӯдакони гирифтори марҳилаи IV бемории саратон кумаки паллиативӣ расонида мешавад. Инчунин дар ин ҷо ҳар шахс, ҳатто дар марҳилаҳои вазнинтарини беморӣ на танҳо бо табобат, балки бо оромиш, дастгирӣ ва эҳтироми инсонии комил таъмин карда мешавад.

Ҳуҷраҳо бо технологияҳои замонавӣ таъмин шуда, барои кӯдакон ва хонаводаҳои онҳо шароити мусоид, инчунин имконияти гирифтани ёрии тиббӣ ва руҳию равонӣ фароҳам карда шудааст.  Мутахассисони соҳа бо истифода аз имконияти муҳайёгардида фаъолияти хешро аз пештара ҳам беҳтар менамоянд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон