«Амонатбонк» дар доираи панҷсолаи рушди иқтисоди рақамӣ конфронси илмӣ-амалӣ баргузор намуд

ДУШАНБЕ, 02.10.2025 /АМИТ «Ховар»/. Дар доираи Солҳои рушди иқтисоди рақамӣ ва инноватсия эълон гардидани солҳои 2025-2030 дар шаҳри Душанбе  дар мавзуи «Рушди иқтисоди рақамӣ ва инноватсия тақозои замон аст» конфронси илмӣ-амалӣ баргузор гардид, иттилоъ медиҳад АМИТ «Ховар» бо истинод ба «Амонатбонк».

Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» ва Агентии инноватсия ва технологияҳои рақамии назди Президенти Ҷумҳурии Тоҷикистон  аз созмондиҳандагони конфронси илмӣ-амалӣ  буданд.

Бо мақсади дар ҷомеаи Тоҷикистон фарогир шудани тафаккури техникӣ ва ҷаҳонбинии илмӣ Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон солҳои 2025-2030-ро Солҳои рушди иқтисоди рақамӣ ва инноватсия эълон намуданд.

Роҳбарияти «Амонатбонк» иброз намуд, ки «имрӯз мо дар давраи тағйироти босуръати рақамикунонии ҳама соҳаҳои иқтисодиёти мамлакат, ки барои тақвияти иқтисод ва фароҳамсозии дастрасӣ ба хизматрасонии молиявӣ зарур аст, қарор дорем. «Амонатбонк» ҳамчун институти молиявӣ дарк мекунад, ки дар ин марҳила таҳкими субот, бехатарии низомҳо ва муҳайёсозии замина барои навоварӣ ва дастгирии лоиҳаҳои рақамӣ афзалият дорад».

Таъкид гардид, ки бо қабули Фармони Президенти Ҷумҳурии Тоҷикистон   аз 22 июни соли 2023 «Дар бораи тадбирҳои вусъат додани ҳисоббаробаркунии ғайринақдӣ» дар рақамикунонии равандҳои тиҷоратии соҳавии муассисаю ташкилоти давлатӣ таҳаввулоти муҳим ба вуҷуд омад. Дар ин замина фаъолияти ҳамоҳанги ҳама ҷонибҳо — давлат, бахши хусусӣ ва институтҳои молиявӣ тавассути ҳамраъйӣ ва эҷодкорӣ ба тақвияти иқтисоди рақамӣ такони ҷиддӣ бахшид.

Дар конфронс  намояндагони вазорату идораҳо, Бонки миллии Тоҷикистон, ташкилоти қарзӣ, ширкатҳои операторони мобилӣ ва ширкатҳои инноватсионии IT- технологияҳо дар мавзуъҳои «Тамоюли рушд», «Пардохтҳои ғайринақдӣ – яке аз заминаҳои асосии рушди иқтисоди рақамӣ», «Инноватсия дар заминаи Корти миллӣ:Tap to Phone қадами стратегӣ» ва «Иқтисоди рақамӣ ва инноватсия, дурнамои рушди он»  маъруза намуданд.

Давоми солҳои Истиқлоли давлатӣ аз ҷониби Ҳукумати ҷумҳурӣ оид ба дастгирии неруи илмӣ, таҷдиди соҳаи илм ва ба самти ҳалли муаммоҳои иҷтимоию иқтисодӣ равона кардани он якчанд тадбир  андешида шуд. Дар мамлакат таҳкими неруи илмию техникӣ ҳамчун яке аз шартҳои зарурӣ дар такмили иқтисодиёт ва гузариш ба роҳи инноватсионии рушд самти афзалиятноки стратегӣ дониста шудааст.

Самтҳои муайяннамудаи Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олӣ  вобаста ба рақамикунонии соҳаҳои иқтисодию иҷтимои мамлакат қадами устувор дар роҳи амалисозии муташаккилонаи раванди ҳукумати электронӣ дар идоракунии мақомоти давлатӣ ва иқтисодиёт арзёбӣ карда мешаванд.

АКС: «Амонатбонк»