Варзишгоҳи нави марказии ноҳияи Восеъ дорои 21 ҳазор ҷойи нишаст мебошад

ДУШАНБЕ, 26.10.2025 /АМИТ «Ховар»/. Варзишгоҳи нави марказии ноҳияи Восеъ дорои 21 ҳазор ҷойи нишаст, аз ҷумла 4 минбар барои мухлисон буда, дарозию паҳноии майдони футболи он 105 ба 68 метр аст. Майдони футбол дорои чамани табиӣ мебошад. Ин имкон медиҳад, ки бозингарон дар майдони ба талаботи мусобиқаҳои байналмилалӣ ҷавобгӯ бозӣ ва тамрин намоянд. Атрофи чаман, ки бо роҳрави резинӣ барои дав иҳота гардидааст, барои машқ ва қабули мусобиқаҳои риштаи варзиши сабук пешбинӣ гардидааст, хабар медиҳад АМИТ «Ховар».

Дар ҳудуди иншоот ду майдонча барои футболи хурд, волейбол ва баскетбол, таваққуфгоҳ барои мошинҳо, зеристоҳи барқӣ, чоҳи амудӣ барои бо об таъмин кардани варзишгоҳ ва дигар иншооти ёрирасон бунёд шудааст.

Бинои варзишгоҳ аз се ошёна, аз ҷумла аз ҳуҷраҳои корӣ, ивази либос, ҳаммому дигар ҳуҷраҳои ёрирасон иборат мебошад. Инчунин дар он толорҳои варзишӣ муҷаҳҳаз бо таҷҳизоти муосири варзишӣ, ҷой барои меҳмонони фахрӣ, маҷлисгоҳ бо 40 ҷойи нишаст ва пешайвон омода гардидааст, ки ба талаботи муосир ҷавобгӯ мебошад.

Барои таъмини рӯшноӣ дар майдони футбол 4 манораи калони муосири равшанидиҳанда насб гардидааст. Ин имкон медиҳад, шабона ҳам мусобиқаҳо гузаронда шаванд.

Ёдовар мешавем, ки варзишгоҳ аз ҷониби «Дирексияи сохтмони иншооти ҳукуматӣ»-и Дастгоҳи иҷроияи Президенти Ҷумҳурии Тоҷикистон бунёд ёфтааст. Корҳои сохтмонии иншоот соли 2017 оғоз гардида, бо харҷи наздики 69 миллион сомонӣ ба итмом расид. 22 октябри соли равон варзишгоҳи мазкур бо иштироки Президенти мамлакат муҳтарам Эмомалӣ Раҳмон ба истифода дода шуд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»