«ҶАВОНОН ВА ВАРЗИШГАРОН -САДОҚАТ БА ПЕШВОИ МИЛЛАТ ВА ПАРЧАМИ ДАВЛАТӢ». Бо чунин унвон «Дав барои хушҳолӣ» баргузор гардид

ДУШАНБЕ, 20.11.2025 /АМИТ «Ховар»/. Бахшида ба Рӯзи Парчами давлатии Ҷумҳурии Тоҷикистон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамбастагӣ бо Кумитаи миллии олимпии Тоҷикистон чорабинии тантанавии ҷавонону варзишгарон ва «Дав барои хушҳолӣ» таҳти унвони «Ҷавонон ва варзишгарон -садоқат ба Пешвои миллат ва Парчами давлатӣ» баргузор гардид. Дар ин хусус ба АМИТ «Ховар» аз Кумитаи кор бо ҷавонон ва варзиш хабар доданд.

Дар чорабинӣ роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, намояндагони федератсияҳои варзишии кишвар, директорони муассисаҳои ҷумҳуриявию шаҳрӣ, мураббиёну варзишгарони касбии мамлакат иштирок намуданд.

Раиси Кумитаи кор бо ҷавонон ва варзиш Зулфиқор Гулаҳмадзода изҳор намуд, ки имрӯз ҷавонону варзишгарон кишвари азизамон бо дастгириву ҳидоятҳои ҳамешагии Президенти Ҷумҳурии Тоҷикистон муҳтарам Эмомалӣ Раҳмон ба хотири арҷгузорӣ ба муқаддасоти давлату Ватан ва парафшон намудани Парчами миллӣ дар майдонҳои байналмилалӣ бо иродаи қавӣ, матонат ва корнамоиҳои шоиста фаъолона ҳунарнамоӣ доранд.

Бо талошҳои онҳо имрӯз Парчами давлатии Тоҷикистон дар байни парчами садҳо кишвари ҷаҳон парафшон мегардад ва Суруди миллии Тоҷикистон садо медиҳад. Ин на танҳо ифтихори варзишгарон, балки рамзи баландпарвози давлату миллат мебошад.

Таъкид шуд, ки ҷавонон бояд ҳамеша зери парчами муқаддаси хеш ҳимоятгари манфиатҳои давлату миллат бошанд, Парчами миллиро ҳамчун сарвати гаронбаҳои умумимиллӣ эҳтиром намоянд ва ба насли наврас эҳсоси баланди ифтихор аз он ва ҳимояи онро талқин кунанд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон