COP30. Дар Бразилия саҳми Тоҷикистон дар Соли байналмилалии ҳифзи пиряхҳо таъкид гардид

ДУШАНБЕ, 20.11.2025 /АМИТ «Ховар»/. 18 ноябр дар шаҳри Белени Бразилия дар доираи Конфронси Созмони Милали Муттаҳид оид ба тағйирёбии иқлим (#COP30) бо ташаббуси Ҷумҳурии Тоҷикистон ва Гурӯҳи сатҳи баланди «Ҳадафҳо барои обшавии ях» (AMI), ки ба талафоти босуръати криосфераи ҷаҳонӣ бахшида шудааст, чорабинии сатҳи баланд баргузор гардид. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.

Дар чорабинӣ иброз гардид, ки ҳифзи пиряхҳо ва пӯшиши барф калиди таъмини устувории захираҳои об, ҳифзи соҳилҳо, пешгирии хатари тағйирёбии хатарноки иқлим ва нигоҳ доштани тавозуни экологӣ мебошад.

Олимони пешбар маълумоте пешниҳод карданд, ки обшавии криосфера нисбат ба пешгӯиҳои қаблӣ зудтар рух медиҳад ва дар бисёр минтақаҳо аз ҳадди мутобиқшавӣ зиёдтар аст.

Сипас бо иштироки вазирон ва намояндагони Чили, Шоҳигарии Монако, Фиҷи, Непал, Либерия, Покистон, Бангладеш, Гурҷистон ва Бонки рушди Осиё ҳамоиш баргузор гардид.

Кишварҳо таҷрибаи худро дар соҳаи ҳифзи пиряхҳо, баланд шудани сатҳи баҳр ва дигар хатарҳои марбут ба ноустувории криосферӣ баррасӣ намуданд.

Иштирокчиён зарурати ҳамгироии масъалаҳои криосфераро ба стратегияҳои миллии мутобиқшавӣ ва устуворӣ, бахусус дар заминаи ноил шудан ба ҳадафи паст кардани ҳарорат то 1.5°C, инчунин тақвияти мониторинг, огоҳкунии бармаҳал ва дастгирии молиявӣ барои кишварҳои осебпазир таъкид намуданд.

Дар ин чорабинӣ саҳми Тоҷикистон дар Соли байналмилалии ҳифзи пиряхҳо (2025), ки огоҳии ҷаҳониро дар бораи мушкилоти обшавии босуръати пиряхҳо баланд мебардорад, ба таври махсус таъкид карда шуд.

Чорабинӣ бо даъват барои афзоиши ҳадафҳои иқлимии ҷаҳонӣ бе истифодаи усулҳои хатарноки геоинженерӣ барои пешгирӣ аз нуқтаҳои гардиши баргардониданашаванда барои пиряхҳо, қабатҳои ях ва ҷараёнҳои уқёнус анҷом ёфт.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон