Дар Бадахшон бахшида ба Рӯзи милитсияи тоҷик ҳамоиши идона доир шуд

ДУШАНБЕ, 10.11.2025 /АМИТ «Ховар»/. Дар Театри мусиқию мазҳакавии ба номи Меҳрубон Назарови шаҳри Хоруғ бахшида ба Рӯзи милитсия ҷамъомади тантанавӣ баргузор шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар медиҳад.

Дар ҳамоиши идона Раиси Вилояти Мухтори Кӯҳистони Бадахшон Алишер Мирзонабот изҳор дошт, ки «ҷашн гирифтани Рӯзи милитсия ин далели эҳтироми мардуми шарифи Тоҷикистон нисбат ба хизмати содиқонаи милисаҳои шуҷоъ маънидод гардида, эътибори баланди Ҳукумати Ҷумҳурии Тоҷикистонро ба ҷойгоҳи мақомоти корҳои дохилӣ дар таъмини суботи иҷтимоӣ ва ҳифзи дастоварду арзишҳои миллию давлатӣ нишон медиҳад. Бо дастгирӣ ва ғамхориҳои Ҳукумати ҷумҳурӣ, хусусан Президенти мамлакат муҳтарам Эмомалӣ Раҳмон мақомоти милитсия, аз ҷумла Раёсати Вазорати корҳои дохилӣ дар Вилояти Мухтори Кӯҳистон Бадахшон бо тамоми лавозимоти хизматӣ- бинову иншооти замонавӣ, мошинҳо ва дигар инфрасохтори зарурӣ таъмин гардидааст».

Сардори Раёсати Вазорати корҳои дохилӣ дар Вилояти Мухтори Кӯҳистон Бадахшон Рустам Шафизода гуфт, ки аз рӯзи таъсиси милитсияи тоҷик кормандони ин ниҳод дар сафи пеши мубориза барои таъмини тартиботи ҷамъиятӣ ва ҳифзи ҳуқуқу озодиҳои шаҳрвандон истода, кори ин ниҳоди муҳими давлатдориро садоқатмандона идома медиҳанд.

Дар ҳамоиши идона як зумра кормандони мақомоти корҳои дохилии вилоят бо «Ифтихорнома»-и Вазорати корҳои дохилӣ, медал, рутбаҳои навбатӣ, «Ифтихорнома»-и Раиси Вилояти Мухтори Кӯҳистони Бадахшон ва «Ифтихорнома»-и Раёсати Вазорати корҳои дохилӣ дар Вилояти Мухтори Кӯҳистон Бадахшон қадрдонӣ гардиданд. Инчунин ба собиқадорони ин соҳа туҳфаҳои хотиравӣ тақдим карда шуд.

Чорабиниро аҳли санъату ҳунари вилоят бо барномаи рангини фарҳангӣ ҳусни анҷом бахшиданд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон