Дар ноҳияи Ёвон варзишгарони ҷавон барои дастовардҳои назаррас қадрдонӣ шуданд

ДУШАНБЕ, 20.11.2025 /АМИТ «Ховар»/. Раиси ноҳияи Ёвон бо варзишгарони ҷавон, ки дар муҳорибаҳои омехта ва ҷудо сазовори камарбанди чемпионӣ гардиданд, вохӯрӣ намуд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон хабар доданд.

Раиси ноҳия Икромиддин Вализода ба варзишгарон барои намояндагии шоистаи ноҳия ва баланд бардоштани Парчами Тоҷикистон изҳори миннатдорӣ намуда, таъкид кард, ки дастовардҳои онҳо натиҷаи заҳмати рӯзафзун, интизом, матонат ва дастгирии ҳамешагии давлату Ҳукумат нисбат ба рушди соҳаи варзиш мебошад.

Иброз гардид, ки сиёсати варзишпарваронаи Пешвои миллат муҳтарам Эмомалӣ Раҳмон имкон медиҳад, ки ҷавонони мамлакат  дар арсаҳои ҷаҳонӣ бо дастовардҳои арзанда Парчами Тоҷикистони соҳибистиқлолро боз ҳам баланд бардоранд.

Ҳар як варзишгари ғолиб оид ба ҷараёни мусобиқа, рақобатҳои шадид ва омодагиҳои пеш аз мусобиқа иттилоъ дода, таъкид намуд, ки камарбанди чемпионӣ барои онҳо на танҳо нишони ғалаба, балки масъулияти бештар дар роҳи камолоти касбии минбаъда мебошад.

Изҳори умедворӣ карда шуд, ки онҳо минбаъд низ шарафи варзишии ноҳия ва мамлакатро дар мусобиқаҳои минтақавӣ ва байналмилалӣ ҳимоя мекунанд.

АКС: Мақомоти иҷроияи ҳокимияти давлатии ноҳияи Ёвон