Горан Стеванович: «Мо ба шаҳри Дарвин барои ба даст овардани се имтиёз омадаем»
ДУШАНБЕ, 18.11.2025 /АМИТ «Ховар»/. Имрӯз, соати 16:00 бо вақти маҳаллӣ (11:30 бо вақти Душанбе) бозии даври панҷуми марҳилаи интихобии Ҷоми Осиё-2027 дар гурӯҳи «А» байни дастаҳои мунтахаби Тимори Шарқӣ ва Тоҷикистон оид ба футбол дар Варзишгоҳи Лигаи регбии шаҳри Дарвини Австралия баргузор мешавад. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.
Сармураббии дастаи мунтахаби Тоҷикистон Горан Стеванович, мутахассиси сербиягӣ дар нишасти матбуотии пеш аз бозӣ ба хабарнигорон гуфт, ки «рақибро хуб мешиносем. Ин даста дар меҳмонӣ ба муқобили дастаи мунтахаби Филиппин тақрибан бозии баробар дошт, ҳатто як муддат пеш ҳам буд. Дастаи мунтахаби Тимори Шарқӣ чанд бозингари сареъ дорад. Мо ҳарифи худро ҷиддӣ мегирем ва ба бозии пеши рӯ омода мешавем. Мо ба шаҳри Дарвин барои ба даст овардани се имтиёз омадаем ва бо дастаи мунтахаби Тимори Шарқӣ танҳо барои пирӯзӣ бозӣ хоҳем кард».
Дар бозии дигари даври панҷум дар гурӯҳи «I» дастаи мунтахаби Молдив дар майдони худ бо дастаи мунтахаби Филиппин вориди рақобат мешавад. Ин бозӣ дар шаҳри Мале, дар Варзишгоҳи миллии футболи Молдив, соати 15:30 бо вақти Душанбе шуруъ мегардад.
Баъди натиҷагирии бозиҳои даври чоруми мусобиқот дар гурӯҳи «А» дастаҳои мунтахаби Филиппин ва Тоҷикистон 10-имтиёзӣ гирифтаанд. Аз рӯи таносуби беҳтари тӯбҳо дастаи мунтахаби Филиппин дар ҷойи аввал ва дастаи мунтахаби Тоҷикистон дар ҷойи дуюм қарор доранд. Дастаи мунтахаби Тимори Шарқӣ бо 3 имтиёз дар ҷойи сеюм ва дастаи мунтахаби Молдив бе имтиёз дар ҷойи чорум мебошанд.
Ёдовар мешавем, ки дар марҳилаи гурӯҳии Ҷоми Осиё-2027 тимҳои миллӣ ба шаш гурӯҳи иборат аз чаҳордастаӣ тақсим шудаанд. Ҳар даста дар гурӯҳ шаш бозӣ – се рақобат дар майдони худ ва се бозӣ дар меҳмонӣ анҷом медиҳад. Танҳо ғолибони гурӯҳҳо ба қисми ниҳоии Ҷоми Осиё, ки аз 15 январ то 8 феврали соли 2027 дар Ҷумҳурии Арабистони Саудӣ баргузор мешавад, роҳ меёбанд.
АКС: Федератсияи футболи Тоҷикистон
Дар Тоҷикистон Форуми байналмилалии ҷавонони давлатҳои аъзои Созмони ҳамкории Шанхай баргузор шуд
Шаҳри Кӯлоб мизбони Ҷоми Президенти Ҷумҳурии Тоҷикистон оид ба гӯштини ҷудо мегардад
Дастаи «Сипар»-и Хуҷанд бори дуюм унвони чемпиони Ҷоми Тоҷикистон оид ба футзалро сазовор гардид
Рустами Эмомалӣ дар ноҳияи Дарвоз варзишгоҳи болопӯшидаи «Нури Модар Арена», майдони хурди футбол ва ҳавзи шиновариро мавриди истифода қарор доданд
Президенти Федератсияи футболи Тоҷикистон Рустами Эмомалӣ дар Дарвоз Академияи футболи Вилояти Мухтори Кӯҳистони Бадахшонро ифтитоҳ намуданд
Дар ноҳияи Мир Сайид Алии Ҳамадонӣ Фестивали бозиҳои миллии варзишӣ баргузор гардид
Дар вилояти Суғд ғолибони мусобиқаи вилоятӣ муайян гардиданд
Дастаи мунтахаби духтаронаи Тоҷикистон тими Амороти Муттаҳидаи Арабиро мағлуб намуд
Мусобиқаи байналмилалӣ оид ба камонварӣ ҷамъбаст гардид
Дастаи мунтахаби Тоҷикистон ба садгонаи беҳтаринҳои раддабандии ФИФА ворид шуд
Дастаи мунтахаби футзали Тоҷикистон бо дастаи яккачини Русия бозиҳои дӯстона анҷом медиҳад
Маросими гусели ҳайати дастаи мунтахаби паралимпии мамлакат ба Бозиҳои V Параосиёӣ баргузор гардид
