ҶОМИ ҶАҲОН-2025. Имрӯз дастаи наврасони Тоҷикистон (U-17) дар даври дуюм бо дастаи футболи ИМА бозӣ мекунад

ДУШАНБЕ, 08.11.2025 /АМИТ «Ховар»/. Имрӯз, 8 ноябр дастаи наврасони то 17-солаи Тоҷикистон оид ба футбол бозии дуюми худро дар Ҷоми ҷаҳон-2025, ки дар Қатар ҷараён дорад, анҷом медиҳад. Дастаи Тоҷикистон бо тими Иёлоти Муттаҳидаи Амрико, ки мунтахаби Буркина Фасоро дар даври аввали мусобиқа бо ҳисоби 1:0 шикаст дод, рӯ ба рӯ хоҳад шуд.

Тавре ба АМИТ «Ховар» аз Федератсияи футболи Тоҷикистон хабар доданд, вохӯрӣ дар майдони 2-юми Маҷмааи варзишии «Aspire Zone»-и шаҳри Давҳа баргузор гашта, соати 17:45 ба вақти маҳаллӣ (соати 19:45 ба вақти Душанбе) оғоз мешавад.

Ёдовар мешавем, ки дар даври якуми Ҷоми ҷаҳон-2025 дастаи мунтахаби Тоҷикистон аз тими Чехия бо ҳисоби 1:6 мағлуб гардид.

АКС: Федератсияи футболи Тоҷикистон