Сокинони ноҳияи Вахш соҳиби туҳфаи Пешвои миллат- «Шоҳнома»-и безавол мегарданд

ДУШАНБЕ, 20.11.2025 /АМИТ «Ховар»/. Дар доираи иқдоми фарҳангии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияи Вахш тақсими шоҳасари безаволи Абулқосим Фирдавсӣ — «Шоҳнома» оғоз гардид, хабар медиҳад АМИТ «Ховар».

Ин туҳфаи арзишманди Пешвои миллат  ба 29 ҳазору 530 оилаи ноҳия тақсим карда мешавад.

Иқдоми навбатии  Сарвари давлат оид ба интишор ва ба ҳар хонаводаи тоҷик тақдим кардани «Шоҳнома»-и безаволи Ҳаким Фирдавсӣ идомаи ташаббусҳои дурбинонаю ватандӯстонае мебошад, ки на танҳо ба баланд бардоштани  эҳсоси ватандӯстии мардум, балки ба боло бурдани сатҳи маънавӣ, ҷаҳонбинию дунёшиносии сокинони мамлакат нигаронида шудааст.

Ёдовар мешавем, ки дар идомаи татбиқи ин ташаббус соли 2026 Озмуни ҷумҳуриявии «Шоҳномахонӣ» доир мешавад. Ин озмун, ки ба ифтихори ҷашни 35-солагии Истиқлоли давлатӣ доир мегардад, бо мақсади таҳкими ҳувияти миллӣ, арҷгузорӣ ба таърихи пурифтихори миллати тоҷик, эҳёи ҳофизаи таърихӣ ва омӯзиши ҳамаҷонибаи осори адабии ниёгон ташкил карда мешавад.

Сарпарасти озмун Президенти Ҷумҳурии Тоҷикистон муҳтарам Эмомалӣ Раҳмон буда, барои мукофотонидани ғолибон аз Фонди захиравии Президент 2 миллиону 660 ҳазор сомонӣ пешбинӣ шудааст.

АКС: АМИТ «Ховар»