Байни деҳаю маҳаллаҳои аҳолинишини ҷамоатҳои шаҳру ноҳияҳои Тоҷикистон мусобиқаи футбол оғоз гардид

ДУШАНБЕ, 11.12.2025 /АМИТ «Ховар»/. Дар Варзишгоҳи ҷумҳуриявӣ марҳилаи ниҳоии мусобиқаи варзишии футбол байни деҳаҳо ва маҳаллаҳои аҳолинишини ҷамоатҳои шаҳру ноҳияҳои ҷумҳурӣ бо иштироки даҳҳо даста аз минтақаҳои гуногуни мамлакат ифтитоҳ гардид. Дар ин хусус ба АМИТ «Ховар» аз Кумитаи кор бо ҷавонон ва варзиши Тоҷикистон хабар доданд.

Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода баргузории чунин мусобиқаҳои оммавиро дар таҳкими тарзи ҳаёти солим, рушди варзиш дар маҳалҳо ва густариши ҳамкории ҷавонон байни минтақаҳо қадами муҳим ҳисобид.

Иброз гардид, ки сиёсати давлатии ҷавонон ва варзиш зери роҳбарии Пешвои миллат муҳтарам Эмомалӣ Раҳмон ба рушди варзишҳои оммавӣ, хусусан футбол равона гардидааст.

Мусобиқа аз 10 то 14 декабр идома ёфта, дар он дастаҳои Душанбе-1, ВМКБ, Хатлон-1, ШНТҶ-1, Душанбе-2, Суғд, Хатлон-2 ва ШНТҶ-2 рақобат мекунанд.

Беҳтарин дастаҳо бо Ҷом, медал, Диплом ва мукофотҳои пулӣ сарфароз гардонида мешаванд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон