Ташаббуси Тоҷикистон оид ба ҳифзи кафтори рахдор дар COP-20 дастгирӣ ёфт
ДУШАНБЕ, 05.12.2025 /АМИТ «Ховар»/. Аз 24 ноябр то 5 декабри соли 2025 дар шаҳри Самарқанди Ҷумҳурии Узбекистон Конфронси 20-уми Конвенсия оид ба савдои байналмилалии намудҳои ҳайвоноти ваҳшӣ ва набототи ёбоии зери хатари нобудшавӣ қарордошта (СИТЕС) баргузор гардид, ки дар он аз Тоҷикистон намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон иштирок намуданд.
Тавре аз ин кумита ба АМИТ «Ховар» хабар доданд, дар конфронс намояндагони беш аз 130 кишвар, роҳбарони созмонҳои ҷаҳонӣ, коршиносони бонуфуз ва ҷомеаи илмӣ иштирок намуданд.
Зимни конфронс масъалаҳои марбут ба ҳифзи муҳити зист, тағйирёбии иқлим, муҳофизати намудҳои нодири ҳайвонот ва таҳкими ҳамгироии кишварҳо баррасӣ гардид.
Дар доираи конфронс 27 ноябр бо ибтикори Кумитаи ҳифзи муҳити зисти назди Ҳукумати Ҷумҳурии Тоҷикистон чорабинии канорӣ оид ба мақоми ҳифз ва нигоҳдории кафтори рахдор гузаронида шуд.
Дар натиҷа пешниҳоди Ҷумҳурии Тоҷикистон оид ба кафтори рахдор ки дар ҳолати ҷиддии маҳвшавӣ қарор дорад, аз замимаи 3-и Конвенсия оид ба савдои байналмилалии намудҳои ҳайвоноти ваҳшӣ ва набототи ёбоии зери хатари нобудшавӣ қарордошта ба замимаи 2-юми ин Конвенсия гузаронида шуд. Ин иқдом 4 декабр дар ҷаласаи пленарии COP-20 расман қабул гардида, аз ҷониби аксари кишварҳои иштироккунанда дастгирӣ ёфт.
Иброз шуд, ки ворид гардидани кафтори рахдор ба замимаи 2-юми Конвенсияи CITES имкон медиҳад, ки ҳимояи байналмилалии ин намуд ба таври назаррас тақвият ёбад. Бо ин тасмим савдои байналмилалии ҳайвон ва узвҳои он таҳти назорати қатъӣ қарор мегирад. Инчунин имконоти мониторинг ва таҳқиқоти илмӣ дар сатҳи ҷаҳонӣ бештар гардида, барномаҳои ҳамоҳангсозии байналмилалӣ оид ба ҳифзу барқарорсозии он густариш меёбад. Дар ин замина давлатҳо уҳдадор мегарданд, ки дар қаламрави худ чораҳои заруриро барои пешгирии қочоқ ва нестшавии ин ҳайвон ба роҳ монанд.
Бояд гуфт, ки дар давлатҳои Осиёи Марказӣ ин намуди ҳайвон ба чораҳои иловагии ҳифз ва мониторинги дақиқ ниёз дорад. Дар ҳамин замина ташаббуси Ҷумҳурии Тоҷикистон ҳамчун иқдоми саривақтӣ ва мувофиқ ба сиёсати устувори экологии мамлакат пазируфта шуд.
АКС: Кумитаи ҳифзи муҳити зисти назди Ҳукумати Ҷумҳурии Тоҷикистон
РАВАНДИ ОБИ ДУШАНБЕ. Тоҷикистон барои пешбурди рӯзномаи ҷаҳонии об тамоми кӯшишҳоро ба харҷ медиҳад
Ҳайати Тоҷикистон дар намоишгоҳи «Ҳафтаи байналмилалии сабз» дар шаҳри Берлини Олмон иштирок дорад
Ташаббусҳои байналмилалӣ нуфузи Тоҷикистонро қавитар мегардонанд
Баҳодур Шерализода: «Қабули Қатъномаи ЮНЕП дар пешбурди дипломатияи муҳити зисти Тоҷикистон нақши назаррас дорад»
ТАШАББУСҲОИ ТОҶИКИСТОН ДАР СОҲАИ ОБУ ИҚЛИМ. Аз соли 1940 то соли 2017 — дар ҳар даҳсола аз +0,1 то +0,2 дараҷа ҳарорати ҳаво баланд шудааст
Таъсиси Шурои миллии об дар Тоҷикистон қадами муҳим дар самти идоракунии устувори захираҳои об аст
РАВАНДИ ОБИ ДУШАНБЕ. Моҳи майи соли 2026 Душанбе мизбони Конфронси чоруми байналмилалии сатҳи баланд оид ба Даҳсолаи байналмилалии «Об барои рушди устувор» мегардад
МАЪРИФАТИ ҲУҚУҚӢ — ПОЯИ АДОЛАТ. Дар робита ба ташаббуси Тоҷикистон дар бораи «Соли байналмилалии маърифати ҳуқуқӣ, 2027»
«ҲИФЗИ ПИРЯХҲО ВА КРИОСФЕРА». Қабули ин қатънома қадами устувор дар масири мутобиқнамоии ноҳияҳои кӯҳсор ба гармшавии глобалии иқлим аст
Соли 2028 Душанбе мизбони Конфронси Созмони Милали Муттаҳид оид ба захираҳои об мегардад
Президенти Тоҷикистон соли 2025-ро соли дастовардҳои назаррас ва рӯйдодҳои муҳими таърихӣ номиданд
