Вазири молияи Тоҷикистон дар конференсияи молиявии рушд дар шаҳри Риёз иштирок намуд

ДУШАНБЕ, 10.12.2025 /АМИТ «Ховар»/. 9 декабр дар шаҳри Риёзи Подшоҳии Арабистони Саудӣ зери унвони «Расидан ба ҳадафҳои рушд» конференсияи молиявии рушд баргузор гардид, ки дар кори он Вазири молияи Ҷумҳурии Тоҷикистон Файзиддин Қаҳҳорзода иштирок намуд.

Тавре ба АМИТ «Ховар» аз Вазорати молияи ҷумҳурӣ хабар доданд, конференсия таҳти сарпарастии Шоҳзодаи Арабистони Саудӣ, Сарвазири ин давлат Муҳаммад Бин Салмон Бин Абдулазиз Ал – Сауд баргузор шуда, дар он намояндагони воломақоми давлатҳо, роҳбарони ташкилоту созмонҳои байналмилалии молиявӣ, аз ҷумла Бонки исломии рушд, фондҳои арабӣ, намояндагони корпусҳои дипломатии муқими Подшоҳии Арабистони Саудӣ, ширкатҳои бонуфузи байналмилалии тиҷоратӣ ва зиёда аз 120 коршиноси сатҳи байналмилалӣ иштирок намуданд.

Дар конференсия тақвияти ҳамоҳангсозӣ ва ҳамгироӣ байни фондҳои рушд, бонкҳо ва муассисаҳои байналмилалии молиявии рушд барои баланд бардоштани самаранокии экосистемаи рушд, тақвияти иқтидори давлатҳо барои қонеъ кардани афзалияти миллӣ, мутобиқ намудани ҳадафҳо барои таъмини таъсири устувории рушд ба ҷомеа ва иқтисодиёт, ҳамзамон густариши ҳамкорӣ байни бахшҳои давлатӣ ва хусусӣ барои таъмини ҳадафҳои рушди иқтисодию иҷтимоӣ баррасӣ карда шуданд.

АКС: Вазорати молияи Ҷумҳурии Тоҷикистон