Ҳамкории милитсия ва соҳаи маорифи шаҳри Душанбе дар самти пешгирии ҷинояткории наврасону ҷавонон тақвият меёбад

ДУШАНБЕ, 05.01.2026 /АМИТ «Ховар»/. Бо мақсади таҳлил ва баррасии сабабу омилҳои содиршавии кирдорҳои ҷинояткоронаю ҳуқуқвайронкунӣ аз ҷониби ноболиғону наврасон ва роҳҳои пешгирии чунин кирдорҳо вохӯрии кормандони милитсияи пойтахт ва намояндагони Саррраёсати маорифи шаҳри Душанбе бо равоншиносони муассисаҳои таълимӣ баргузор гардид. Дар ин хусус ба АМИТ «Ховар» аз Раёсати Вазорати корҳои дохилӣ дар шаҳри Душанбе хабар доданд.

Зимни вохӯрӣ масъалаҳои муноқишаҳои гурӯҳии мактаббачагон, истеъмоли маводи тамоку ва машрубот, истифодаи нодурусти шабакаҳои иҷтимоӣ, гаравидани ноболиғон ба ҳаракатҳои тундгаро ва роҳҳои тарбияи наврасон дар руҳияи ватандӯстию илмомӯзӣ баррасӣ гардиданд.

Иштирокчиён таъкид намуданд, ки нақши омӯзгор-равоншинос дар раванди ба таълиму тарбия фаро гирифтани наврасон аҳамияти калон дорад. Барои рафъи ин мушкилот зарур аст, ки омӯзгорон ва равоншиносони муассисаҳои таълимӣ ҳангоми кумак ба наврасон бо мақомоти амниятӣ ва иҷтимоӣ ҳамкорӣ дошта бошанд.

Зимни вохӯрӣ мутахассисони соҳа ба кормандони ҷавон тавсияҳои муфид доданд. Гуфта шуд, ки баргузории чунин вохӯриҳо ва ҳамкорӣ байни соҳаҳои гуногуни ҷомеа барои таъмини амнияти иҷтимоии ҷавонон, беҳтар кардани ҳолати таълиму тарбия ва фарҳанги наврасон таъсири мусбат дорад.

АКС: Раёсати Вазорати корҳои дохилӣ дар шаҳри Душанбе