Дар Донишгоҳи давлатии молия ва иқтисоди Тоҷикистон Шурои диссертатсионии нав таъсис ёфт

ДУШАНБЕ, 31.01.2026. /АМИТ «Ховар»/. Ҳукумати Ҷумҳурии Тоҷикистон яке аз самтҳои афзалиятноки рушди иқтисодиёти миллиро ташаккули иқтисодиёти «сабз» мешуморад. Зеро иқтисоди «сабз» яке аз самтҳои муосири илми иқтисод ба ҳисоб рафта, давоми ду даҳсолаи охир ба арсаи илм ворид гардид ва дар доираи он бахшҳои дигари иқтисод, ки аз ҷузъҳои табиати муҳити атроф вобастагӣ доранд, баррасӣ карда мешаванд. Бинобар ин, таъсиси Шурои диссертатсионии нав дар назди Донишгоҳи давлатии молия ва иқтисоди Тоҷикистон дар татбиқи ҳадаф, вазифа ва принсипҳои «Стратегияи рушди иқтисоди «сабз» дар Ҷумҳурии Тоҷикистон барои солҳои 2023-2037» бо афзалияти бештар нақши муҳим дорад. Дар ин хусус ба АМИТ «Ховар» аз Донишгоҳи давлатии молия ва иқтисоди Тоҷикистон иттилоъ доданд.

Зимни ҷаласаи ифтитоҳи Шурои диссертатсионии 6D.КОА-108-и назди Донишгоҳи давлатии молия ва иқтисоди Тоҷикистон ректори донишгоҳ Бобоҷон Сатторзода иброз намуд, ки рушду ташаккули илми тоҷик аз масъалаҳои асосиест, ки дар меҳвари сиёсати иҷтимоии Ҳукумати мамлакат қарор дорад. Хушбахтона, зери сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон шумораи шуроҳои дисертатсионӣ беш аз пеш густариш ёфта, бо ин барои рушди илми миллӣ шароити мусоид фароҳам оварда мешавад.

Дар ҷаласа аз ҷониби муовини раиси Комиссияи олии аттестатсионии назди Президенти Ҷумҳурии Тоҷикистон иттилоъ дода шуд, ки дар Донишгоҳи давлатии молия ва иқтисоди Тоҷикистон Шурои диссертатсионӣ дар ҳайати 11 нафар доктору профессор ба муҳлати 2 соли фаъолият тасдиқ карда шудааст.

Дар ҷаласа ташкили Шурои диссертатсионии назди Донишгоҳи давлатии молия ва иқтисоди Тоҷикистон оид ба дарёфти дараҷаи илмии доктори фалсафа (РhD) — доктор аз рӯйи ихтисосҳои 6D050607 — иқтисодиёти нақлиёт ва 6D050612 — иқтисоди “сабз” ва истифодаи захираҳои табиӣ қадами муҳим дар рушди илми миллӣ арзёбӣ гардид.

Иттилоъ дода шуд, ки донишгоҳ дорои 7 факултет, 21 кафедраи тахассусӣ, 8 кафедраи умумидонишгоҳӣ буда, аз рӯйи 60 ихтисоси зинаи бакалавр мутахассис тайёр менамояд. Ба корҳои илмӣ-таълимӣ ва илмию таҳқиқотӣ 403 омӯзгор ҷалб гардидаанд, ки аз онҳо 21 нафар доктори илм ва профессор, 145 нафар номзади илм, 84 муаллими калон ва 153 нафарро ассистентон ташкил медиҳанд, ки дар 14 самт аз рӯйи 14 масъала ва 26 мавзуи илмӣ корҳои илмӣ-таҳқиқотӣ пеш мебаранд. Ҳамчунин дар шуъбаи омодакунии кадрҳои илмӣ ва илмӣ-педагогии донишгоҳ 17 ихтисоси зинаи магистратура, 16 ихтисоси доктори фалсафа (PhD) доктор аз рӯйи ихтисос ва 12 ихтисоси докторантура-унвонҷӯ амал менамояд.

АКС: Донишгоҳи давлатии молия ва иқтисоди Тоҷикистон