Дар Душанбе қуръакашии марҳилаи муқаддамотии Ҷоми ФФТ-2026 оид ба футбол баргузор шуд

ДУШАНБЕ, 13.01.2026 /АМИТ «Ховар»/. 12 январ дар шаҳри Душанбе қуръакашии марҳилаи пешакии Ҷоми Федератсияи футболи Тоҷикистон-2026 оид ба футбол дар минтақаи Душанбе баргузор шуд. Дар ин хусус ба АМИТ «Ховар» аз Федератсияи футболи Тоҷикистон хабар доданд.

Мусобиқаи анъанавии Ҷоми Федератсияи футболи Тоҷикистон пеш аз оғози мавсим дар ду марҳила баргузор мешавад – пешакӣ ва ниҳоӣ. Дар марҳилаи аввал дастаҳо ба се минтақа тақсим мешаванд – Душанбе, Суғд ва Хатлон.

Мусобиқа дар Душанбе 23 январ оғоз гардида, дар он даҳ даста иштирок мекунад. Дар қуръакашӣ дастаҳо ба ду гурӯҳ тақсим шудаанд. Чаҳор дастаи беҳтарин аз минтақаи Душанбе ба марҳилаи ниҳоии Ҷоми ФФТ-2026 роҳ меёбанд.

Фонди умумии ҷоизавии мусобиқа 100 000 сомониро ташкил медиҳад. Ғолиби Ҷом бо 50 000 сомонӣ мукофотонида мешавад. Барандаи медали нуқра бо 30 000 сомонӣ ва медали биринҷӣ бо 20 000 сомонӣ сарфароз мешавад.

Натиҷаи қуръакашии марҳилаи муқаддамотии Ҷоми ФФТ-2026 дар минтақаи Душанбе:

Гурӯҳи «А»: «Рангон», «Сардор», «Регар-ТадАЗ», «Шоҳмансур», «Шодмон».

 Гурӯҳи «Б»: «Душанбе», «Ҳосилот», «Саройкамар», КМВА, «Барқчӣ».

АКС: Федератсияи футболи Тоҷикистон