Дар Минтақаи озоди иқтисодии «Данғара» татбиқи лоиҳаҳои нави сармоягузорӣ бо сармоягузорони Чин баррасӣ гардид

ДУШАНБЕ, 20.01.2026 /АМИТ «Ховар»/. Бо мақсади таҳким бахшидан ба ҳамкории иқтисодию сармоягузорӣ ва ҷалби сармояи хориҷӣ сармоягузорони Ҷумҳурии Мардумии Чин ба Минтақаи озоди иқтисодии «Данғара» омаданд, хабар медиҳад АМИТ «Ховар» бо истинод ба ин минтақа.

Зимни мулоқоти роҳбарияти минтақа бо сармоягузорони чинӣ ҷонибҳо вобаста ба имконияти мавҷудаи сармоягузорӣ, имтиёзҳои ҳуқуқию иқтисодии минтақа, шароити мусоиди фароҳамгардида барои фаъолияти соҳибкорӣ ва дурнамои татбиқи лоиҳаҳои муштарак табодули афкор намуданд.

Иброз гардид, ки Чин яке аз шарикони муҳими сармоягузории Минтақаи озоди иқтисодии «Данғара» ба шумор рафта, ҳамкории дуҷониба бо сармоягузорони чинӣ дар самтҳои гуногуни иқтисодӣ ба таври пайваста рушд меёбад.

Ҷонибҳо барои густариши ҳамкории минбаъда, татбиқи лоиҳаҳои нави сармоягузорӣ ва тақвияти муносибатҳои иқтисодии мутақобил изҳори омодагӣ намуданд.

АКС: Минтақаи озоди иқтисодии «Данғара»