Дар Вилояти Мухтори Кӯҳистони Бадахшон 96 тонна асал истеҳсол карда шуд

ДУШАНБЕ, 02.01.2026 /АМИТ «Ховар»/. Дар 11 моҳи соли 2025 дар Вилояти Мухтори Кӯҳистони Бадахшон 10 ҳазору 737 оилаи занбӯри асал парвариш карда шуд. Дар ин давра 96 тонна асал истеҳсол карда шуд, ки нисбат ба ҳамин давраи соли 2024  33 тонна зиёд мебошад. Дар ин хусус ба АМИТ «Ховар» аз Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар доданд.

Иттилоъ дода шуд, ки соли 2025 теъдоди оилаҳои занбӯри асал 2,5 ҳазор оила зиёд карда шуд.

Таъмини амнияти озуқаворӣ яке аз ҳадафҳои стратегии Ҳукумати Ҷумҳурии Тоҷикистон ба ҳисоб рафта, барои амалисозии он ҳамасола тадбирҳои таъхирнопазир андешида мешаванд.

Дар доираи барномаҳои давлатию соҳавӣ барои рушди соҳаи кишоварзӣ, ки асоси таъмини амнияти ғизоӣ ба ҳисоб меравад, тадбирҳои судманд амалӣ мегарданд.

Бо дастгирии Ҳукумати Ҷумҳурии Тоҷикистон ҳамасола заминҳои нав ба гардиши кишоварзӣ дароварда шуда, садҳо гектар боғҳои мевадиҳанда бунёд ва коргоҳу корхонаҳои коркарди маҳсулоти меваю сабзавот ба истифода дода мешаванд.

АКС: АМИТ «Ховар»